कविताया लाय्कूया नेतृत्व हाकनं नं डा.ज्योतिप्रभा तुलाधरं याइगु जूगु दु ।

वंगु शुक्रबाः क्वचाःगु कविताया लायकूया न्हापांगु अधिवेशनं डा.तुलाधरयात हे निगूगु कार्यकालया नितिं सर्वसम्मतं नायः ल्यःगु खः ।

सर्वसम्मत निर्वाचित न्हूगु ज्यासना पुचलय् न्वकू पदय् हिसिलिना शाक्य व बिनिता बज्राचार्य, छ्याञ्जेया नितिं रजनीमिला, दांभरिंया भाला रहेना नकःमि मानन्धरयात ल्यःगु खः ।

मुँज्यां मन्जु सिंह श्रेष्ठ, विणा नेम्कुल, दिल कुमारी महर्जन, यचु महर्जन, शोभा महर्जन, मन्दिरा श्रेष्ठ व कृता बज्राचार्ययात दुजलय् ल्यःगु खः ।

ज्यासना पुचःया १५म्ह दुजः मध्ये १२ म्ह सर्वसम्मतं ल्यःगु खःसा कविताय् ख्यलय् सक्रियपिं मेपिं स्वम्ह मिसा कवयत्रियात मनोनयन यायेगु खँ नं दँमुँज्याय् क्वःज्यूगु खः ।

वंगु शुक्रबाः ल्यःगु न्हूगु ज्यासना पुचःया न्हापांगु मुँज्या नं शुक्रवाः हे च्वंगु दु । मुँज्याय् छ्याञ्जे रजनीमिलां संस्थाया नियमावली व कार्य योजना न्ह्यब्वयादीगु खः ।

कार्ययोजना कथं नेपालभाषाया  अग्रज व न्हू पुस्ताया स्थापित कविपिं व नेपाली भाषाय् स्थापित नेवाः कविपिनिगु वैचारिक पुचः नीस्वंगु दु ।

डा. आनन्द जोशी, डा. केशवमान शाक्य, प्रतिसरा सायमि, नर्मदेश्वर प्रधान, डा. पुष्पराज राजकर्णिकार, नवीन चित्रकार, पुष्परत्न तुलाधर, श्रीराम श्रेष्ठ, धु्रव मधिकर्मी, नारद बज्राचार्य, लक्ष्मी माली, सुरेश किरण, ईश्वरी मैयाँ श्रेष्ठ, केदार श्रेष्ठ, सुशील राजोपाध्याय, अभय श्रेष्ठ, रामगोपाल आशुतोष, रमी प्रिया, बसन्त नकःमि, नवीन प्रकाश श्रेष्ठ, रासा, तुयु पुं, सुधीर ख्वबिपिन्त कविताया लायकूया मानार्थ दुजः मनोनयन याःगु दु ।

लिसें याकनं हे नायः डा. तुलाधरया ‘आधुनिक काव्यय् विद्रोहया सः’ सफू चिखिफ्यने, कवि ब्वँमि अन्तरसंवाद, कविता कन्सर्ट ज्याझ्वः यायेगु नं मुँज्यां पारित याःगु खः ।