म्येहालामि राजेन्द्र सुवाल व विपना शाक्यया ज्वःम्ये ‘तिम्रो याद’ सार्वजनिक जूगु दु ।

थौं सोमबाः येँय् जूगु छगू ज्याझ्वःया दथुइ वरिष्ठ म्येहालामि जुजुकाजी रंजितं उगु म्येया म्यूजिक भिडियो सार्वजनिक यानादिल ।

म्ये सार्वजनिक यायेधुंकाः ज्याझ्वलय् न्ववासें वरिष्ठ म्येहालामि रंजितं श्रृजनां सर्जकयात न्ह्याबलें म्वाकातइगु बिचाः तसें श्रृजनाय् न्ह्यज्यानाच्वनेत इनाप यानादिल ।

‘भौतिक रुपी सन्तानं अंश कयाः मांअबुयात ल्वःमंका छ्वइ । तर श्रृजनारुपी सन्तानं जन्मदातायात सकसिगु न्ह्यःने म्हसीका बीगुलिसें लिपातक म्वाका नं तइ’ वरिष्ठ म्येहालामि रन्जितं धयादिल ।

नेवाः देय् दबूया नायःलिसें वरिष्ठ समाजसेवी पवित्र बज्राचार्य, वरिष्ठ सिने पत्रकार विजयरत्न तुलाधर, वरिष्ठ संगीतकार बुद्ध सायमिं संगीत व कला ख्यःयात मतिना यानां सर्जक, कलाकारया श्रृजना लाइक कमेन्ट, शेयर यायेत इनाप यानादिल ।

वरिष्ठ फोटोग्राफरलिसें म्येहालामि सुवालया किजा राजभाई सुवालं वंगु दिं लुमंकुसें थः दाजुया ४० दँ न्ह्यःया म्येहालामि जुइगु म्हगस आः वयाः पूवंगु धासें लसता नं प्वंकेगुलिसें भावुक नं जुयादीगु खः ।

म्येहालामिद्वय सुवाल व शाक्य, म्येच्वमि पवन कुमार बुढाथोकी, म्यूजिक भिडियो निर्देशक सुरेन्द्र मानन्धरं थःथःगु अनुभव न्यंकुसें म्ये स्वयाबीत, न्यनाबीत इनाप यानादिल ।

ज्याझ्वलय् वरिष्ठ कलाकार पञ्चरत्न सुवालया विशेष उपस्थिती दुगु खः ।

सुवाल व शाक्यया उगु म्येया म्यूजिक भिडियोलय् किरण जोशी व भिन्तुना जोशीं अभिनय यानादीगु दु । छायाङ्कन बुद्ध सायमीं यानादीगु खःसा दृश्य सम्पादन व रंग संयोजन इन्द्र मानन्धरं यानादीगु दु ।

म्यूजिक भिडियोया बाखंया परिकल्पनाकार सिवानी बज्राचार्यं सुरेन्द्र मानन्धरलिसे जानां निर्देशन नं यानादीगुदु ।

बि.आर. प्रोडक्सनया ब्यानरय् दयेकातःगु थुगु म्यूजिक भिडियो थौं हे (सोमबाः) अडियो नेपाल युट्युब च्यानलय् सार्वजनिक जुइधुंकूगु दु ।