नेपालभाषाया म्यूजिक भिडियोलय् नांजाःम्ह अभिनेता पल शाह खनेदइगु जूगु दु ।

म्येहालामि गोपाल कृष्ण महर्जनं हालादीगु म्ये ‘अयलाः अयलाः’ या म्यूजिक भिडियोलय् पल शाह खनेदयेत्यंगु खः ।

अभिनेता शाहलिसें सृष्टि महर्जनं अभिनय यानादीगु थुगु म्यूजिक भिडियो कन्हय् शनिबाः छगू ज्याझ्वःया दथुइ सार्वजनिक यायेत्यंगु दु ।

कन्हय् शनिबाः सार्वजनिक येँ सुन्धाराया सिटिसि मलय् दुगु सिडिसि सिनेमाय् छगू ज्याझ्वः यासें पल शाह अभिनित उगु म्यूजिक भिडियो सार्वजनिक यायेत्यंगु खः ।

नेपालभाषाया संगीत ख्यलय् बिस्कं कथंया म्ये छपु बीत स्वयागु म्येहालामि महर्जनं धयादिल ।

‘गनतक जितः ताः, आः वयाच्वंगु म्येत स्वयां थ्व भचा पाःगु नं खत, अले न्ह्यइपूगु नं खत । म्ये कथं हे थुकिया म्यूजिक भिडियो दयेकागु दु, मेगु खँ स्वकुमितय् ल्हातय् का’ म्येहालामि महर्जनं धयादिल ।

म्यूजिक भिडियोया निर्देशन नेपालभाषाया संकिपा ख्यःया व्यस्त व नांजाःम्ह निर्देशक सुरेन्द्र तुलाधरं यानादीगु दु ।

डान्स नम्बर म्येया छायाङ्कन किपूया ससःत्वाः, 10X थँबहि व बम्बीर शिवालय ट्रस्ट टेकुइ यानातःगु दु ।

म्यूजिक भिडियोलय् निम्ह मतिनामितय् मतिनायात हे कथावस्तुया रुपं क्यनेत स्वयागु निर्देशक तुलाधरं कनादिल ।

‘स्वकुमियात आनन्द व न्ह्यइपूगु अनुभव जुइमा धइगु बिचाः यानाः लोकेशन व उकियात ल्वयेक ड्रेस, लाइटिङ आदियात ध्यान बियागु दु । म्यूजिक भिडियो बांलायेमा धकाः मेहनत नं व हे कथं यानागु दु’ निर्देशक तुलाधरया धापू खः ।

म्यूजिक भिडियोया छायाङ्कन इश्वर लाल सिंकेमनां यानादीगु दुसा डिओेपी सौरभ लामायागु खः । दृश्य सम्पादन सुजन बडालं यानादीगु दु ।

नांजाःम्ह निर्देशक लिसें रचनाकार पवन जोशीं च्वयादीगु म्येग्वःयात अनिल तुलाधरं लसय् हनादीगु दु ।

कन्हय् ज्याझ्वलय् प्रिमियर जुयाकथं उगु म्ये ओएसआर डिजिटल युट्युब च्यानलमार्फत विश्वव्यापी सार्वजनिक जुइत्यंगु दु ।