येँ महानगरपालिकां कान्ति बाल अस्पतालया फोहोर ममुनीगु जूगु दु ।

थौं मंगलबाः अस्पतालया फोहोर व्यवस्थापन अभ्यास स्वयेधुंकाः फोहोरया वर्गीकरण व ढुवानी पूर्व तयारीइ कमजोरी खनेदयेधुंकाः मेगु व्यवस्था मजूतल्लेयात फोहोर मुने मफइगु जानकारी अस्पतालयात ब्यूगु खः ।

महानगरपालिकाया उपप्रमुख लिसें अनुगमन समितिया कजि सुनिता डंगोलया नेतृत्वय् अस्पतालया अनुगमन याःगु खः ।

‘अस्पतालय् फोहोर बिस्कं बिस्कं तयेत बाल्टिन तयातःगु दुसां हरेक बाल्टिनय् दक्वं कथंया फोहोर ल्वाकछ्यानातःगु खनेदत । ल्वयया वासः याइगु थाय् हे ल्वय् उत्पादन याइगु थाय् जुइमज्यू’ उपप्रमुख डंगोलं धयादिल ।

वातावरण व्यवस्थापन विभागया प्रमुख रविनमान श्रेष्ठं अस्पतालय् फरक प्रकृतिया फोहोर तयेत रङ्ग संकेतया पालना मयाःगु व थुकिं हानीकारक फोहोर अस्पतालं पिहांवइगु खतरा खनेदुबलय् अस्पतालया फोहोर मुनेगु व ढुवानीइ रोक तयेमाःगु जानकारी बियादिल ।

‘स्रोतय् फोहोर ब्यागः तःगु, हानीकारक फोहोर निर्मलीकरण याःगु, निर्मलीकरण जुइधुंकाःया फोहोर हाकनं छ्यलेफइगु व मफइगु कथं बिस्कं तःगु एकिन मजूतल्ले फोहोर मुने फइमखु’ विभाग प्रमुख श्रेष्ठया धापू खः ।

अस्पतालं हानीकारक फोहोर निर्मलीकरण यायेत उपकरण जडान याःगु दु । थुकीयात प्रभावकारी रुपं छ्यलेत स्रोतं वर्गीकरण प्रभावकारी दयेकोःगु टोलीं छ्याता ब्यूगु दु ।

थौं हे येँ मपाया अनुगमन टोलीं महाराजगञ्जस्थित इन्टरनेशनल फ्रेन्डसिप चिल्ड्रेन हस्पिटलया नं अनुगमन याःगु दु ।

अस्पतालय् स्रोतं मुनीगु फोहोर प्रशोधन कक्षय् थ्यनीबलय् छथाय् हे तयेगु याःगु व हानीकारक फोहोर निर्मलीकरणया लागिं तयातःगु अटोक्लेभ मेसिन न्ह्याकेगु मयाःगु खनेदुगु धाःगु दु ।

अनुगमन टोलीं अस्पतालयात वर्गीकरण जूगु फोहोर प्रकृति कथं व्यवस्थापन यायेत निर्देशन ब्यूगु दु ।