नेपालभाषा, नेवाः संचार ख्यःलिसें बौद्ध धर्मया उत्थानय् योगदान बियावःम्ह समाजसेवी लिसें उद्योगपति मोतिलाल शिल्पकार मन्त ।

८९ दँ दुम्ह शिल्पकार सोमबाः न्हिनसिया १ताः इलय् मेडिसिटी अस्पतालय् वासः यायेगु झ्वलय् वयकः मदुगु खः । वय्कःयात ताः ई न्ह्यःनिसें दम व निमोनिया ल्वचं कयाच्वंम्ह वयकःया उसाँय् स्यनेधुंकाः वंगु मंगलबाः अस्पतालय् भर्ना याःगु खः ।

मदुम्ह शिल्पकार ल्वहंकःमि शिल्पकार सेवा समाज यलया संस्थापक नायः लिसें नेपालभाषा मंका खलः यलया मानार्थ दुजः नं खः ।

लिसें वयकः ‘न्हू प्रेस्टिज नेपाः’ लयपौया संचालक व नेवाः प्रेस दबुलिं नीस्वनातःगु मोतिलाल शिल्पकार पत्रकारिता सिरपा’ या संस्थापक व दाता नं खः । बौद्ध धर्मया प्रचार प्रसारय् तःधंगु तिबः बियावःम्ह वयक छम्ह कुशल वाद्य गुरु तकं खः ।

उद्योग क्षेत्रया खँ ल्हायेबलय् वयकः उड कार्भिंग इण्डष्ट्रिजया प्रबन्ध निर्देशक खः ।