थुगुसीया सत्यमोहन जोशी नेपालभाषा साहित्य सिरपा साहित्यकार छत्रबहादुर कायस्थयात लःल्हाःगु दु । शन्चरबाः यलय् जूगु नेपालभाषा मंकाः खलः यलया दँमुँज्याय् कायस्थयात उगु सिरपा लःल्हाःगु खः ।

ज्याझ्वलय् वागमति प्रदेशया उद्योग, वाणिज्य, भूमि तथा प्रशासन मन्त्री रामकृष्ण चित्रकारं कायस्थयात सिरपाया दसिपौ लःल्हायेगु नापं दोसल्ला न्ययेका पुरस्कृत यानादिल ।

थःगु नुगःखँ तयेगु झ्वलय् मन्त्री चित्रकारं स्थानीय भाय्, कला, साहित्यया संरक्षणय् प्रदेश सरकारं फक्व तिबः बीगु व सहकार्य यायेगु प्रतिवद्धता प्वंकादिल ।

अथेहे संघीय सांसद प्रेमबहादुर महर्जनं विगतया दमन व अत्याचारया विद्रोहया लिच्वः कथं नेपालभाषा मंकाः खलः थेंजाःगु संस्थाया उदय जूगु लुमंकुसें आः स्थानीय समाज व स्वंगू तहया सरकार नापनापं न्ह्याःवनेमाःगुलिइ बः बियादिल ।

नेवाः देय् दबूया न्वकू उमेश स्थापितं सकल नेवाः संघसंस्था बिस्कं बिस्कं मखु, छधी जुयाः न्ह्यचिलेमाःगुलिइ बः बियादिल ।

सभाय् मंकाः खलः यलया छ्यान्जे महेन्द्रलाल महर्जनं वार्षिक कार्य प्रगति प्रतिवेदनया नापं भावी योजना व दांभरिं उकुलाल महर्जनं आर्थिक प्रतिवेदन न्ह्यब्वयादिल ।

अथेहे नायः हिराकाजी महर्जनं स्थानीय भाय्, कला, साहित्यया उत्थानया नापं थःगु हक अधिकार प्राप्तिया नितिं सः थ्वयेकेत छपाः हे कुसा क्वय् च्वनेत सकसित इनाप यानादिल ।