नेवाः पत्रकार राष्ट्रिय दबूया येँ जिल्लाय् रत्नकाजी महर्जन ‘मनं’ नेतृत्व याइगु जूगु दु ।

दबू येँ जिल्लाया शनिबाः येँय् क्वचाःगु न्याक्वःगु तःमुँज्यां रत्न मनया नेतृत्वय् १५म्हेसिया कार्यसमिति सर्वसम्मत ल्यःगु खः ।

जिल्लाया न्हूगु ज्यासना पुचलय् उपाध्यक्ष खुलापाखे विरेन्द्र शाक्य (विविशा) चयन जूगु दुसा मिसा उपाध्यक्षय् विमला मानन्धर ल्यःगु दु ।

छ्यान्जेया भाला राजेन्द्र मानन्धरयात ब्यूबलय् ल्यू छ्यान्जे सुविन्द्र श्रेष्ठ व मिसा ल्यू छ्यान्जेय् तुलसी केशरी प्रजापति व दांभरिंया भाला प्रशान्त डंगोलयात ब्यूगु दु ।

च्याम्ह दुजलय् कृष्णमान श्रेष्ठ, रश्मी नापित, सलिना शाक्य, रविन्द्र बज्राचार्य, नहकुल महर्जन, अस्मिता श्रेष्ठ,सागर राजलवत व किचः सिंह दु ।

तःमुँज्याय् केन्द्रीयलिसें वागमति प्रदेशया पार्षद, किपू नगर कमिटि, तोखा नगर कमिति नं स्वनेगु ज्या याःगु खः ।

केन्द्रीय पार्षदय् गंगादेवी महर्जन, प्रेमकुमार श्रेष्ठ,सुगतरत्न सिन्दुराकार, प्रवीणकुमार महर्जन, मनोज श्रेष्ठ “सार्थक”, जुजुमान महर्जन, दिलिप शाही, सुगम ताम्राकार व राजेन्द्रकुमार महर्जन ‘पुता’ दु ।

अथेहे, प्रदेश सभासदय् बिराजकाजी राजोपाध्याय, रविन महर्जन,सुरज मानन्धर, उमेश मानन्धर, मदनराम कर्माचार्य व कुसुम बज्राचार्य दु ।

थुगु हे तःमुँज्यां सानुराज डंगोलया कजिसुइ तोखा नगर कमिटी नीस्वंगु दु । तोखा कमिटीया सचिव पदय् नविना श्रेष्ठ व दुजः हिक्मत डंगोल च्वनादीगु दु ।

प्रताप महर्जनया कजिसुइ नीस्वंगु किपु नगर कमिटिइ छयान्जे ललेन्द्र शाक्य च्वनादीगु दु ।

पत्रकार दबू येँ जिल्ला तःमुँज्या समन्वय समितिया ग्वसालय् जूगु ज्याझ्वःया उलेज्या सत्रय् ज्याझ्वलय् दबूया मूछ्यान्जे केके मानन्धर, केन्द्रीय न्वकू सुरेन्द्र भक्त श्रेष्ठ, वरिष्ठ न्वकू सुनिल महर्जन, केन्द्रीय नायः नृपेन्द्र लाल श्रेष्ठलिसें नं थःथःगु नुगः खँ तयादीगु खः ।

तःमुँज्या समन्वय समितिया कजि व दबूया केन्द्रीय छ्यान्जे राजु नापितं विशेष परिस्थितीइ समन्वय समितिं जिल्लाया तःमुँज्या व दँमुँज्या यायेमाःगु जानकारी बियादीगु खः ।