नेवाः पत्रकार राष्ट्रिय दबू गोरखा जिल्ला कचाया न्याक्वःगु अधिवेशन क्वचाःगु दु ।

भिमसेन थापा गाउँपालिका– ५ मिलन बस्तीको सामुदायिक सभाहलय् जूगु अधिवेशनं हिरालाल श्रेष्ठया नेतृत्वय् न्हूगु ज्यासना पुचः निर्विरोध ल्यःगु दु ।

अधिवेशनं न्हूगु ज्यासना पुचःया न्वकू पदय् आत्मा राम श्रेष्ठयात ल्यःगु दुसा छ्यान्जे पदया भाला विनोद बाबु श्रेष्ठयात ब्यूगु दु । दांभरिं पदय् लक्ष्मी श्रेष्ठ चयन जूगु दु ।

ज्यासना पुचःया दुजलय् लक्ष्मी श्रेष्ठ, राजकुमार श्रेष्ठ व मनोज श्रेष्ठ निर्विरोध निर्वाचित जूगु दु । गण्डकी प्रदेश पार्षद प्रतिनिधिइ अन्जन श्रेष्ठ नं निर्विरोध ल्यःगु दु ।

जिल्ला अधिवेशनय् ब्वति कायेत केन्द्रीय समितिपाखें केन्द्रीय नायः नृपेन्द्रलाल श्रेष्ठ, न्वकू सुरेन्द्रभक्त श्रेष्ठ, मू छ्यान्जे केके मानन्धर, दांभरिं बाबुकाजी श्रेष्ठ, गण्डकी प्रदेश संयोजक उत्तम कुमार श्रेष्ठ, दुजः राजेश शाक्यलिसें दबूया सल्लाहकार वरिष्ठ पत्रकार राजु शाक्य गोरखा थ्यंगु खः ।

दबूया राष्ट्रिय महाधिवेशन गोरखाय् हे यायेगु योजना कथं थःपिं स्थलगत निरीक्षण भ्रमणया नितिं नं गोरखा जिल्ला थ्यंगु केन्द्रीय नायः श्रेष्ठं धयादिल ।

दबूया केन्द्रीय महाधिवेशन वइगु भाद्र १९ व २० गते यायेगु योजना दुगु नायः श्रेष्ठं जानकारी बियादिल ।