नेपालभाषा एकेडेमीया न्ह्यलुवाः साहित्यकार नापलायेगु अभियान नेपालभाषाया ख्यःया प्राज्ञिक संस्था नेपालभाषा एकेडेमीं भाषा ख्यःाय न्ह्यलुवाःतयत नापलायेगु अभियान न्ह्याकूगु दु ।

विशेष यानाः पिहां जुइमफुपिं थकालि साहित्यकारतयत छेँय् छेँय् वना नापलायेगुलिसें वयकःपिनिगु खँ न्यनेगु एकेडेमीया सदस्य सचिव महेन्द्र गोपाल कर्माचार्यं धयादिल ।

अभियान अन्तर्गत शनिबाः जनकवि दुर्गालाल श्रेष्ठ व आख्यानकार मथुरा सायमियात नापलाःगु खः ।

एकेडेमीया चान्सलर मल्ल के. सुन्दरया नापनापं भाइस चान्सलर पुष्पराज राजकर्णिकार, सदस्य सचिव महेन्द्र गोपाल कर्माचार्य, सह सचिव राजित बहादुर श्रेष्ठ लगायत वयकःपिन्त नापलायेत थ्यंगु खः ।

अथेहे, प्राज्ञ दुजःपिं विजयरत्न असंबरे, शाक्य सुरेन, तुलसि सायमि, विद्या चित्रकार, रिता महर्जन, निर्मल बज्राचार्यया नं उपस्थिती दुगु खः ।

एकेडेमीया चान्सलर मल्ल के सुन्दरं थथे न्ह्यलुवा साहित्यकार नापलायेगु ज्यां वयकःपिनिगु नुगलय् उर्जा ब्वलनीगु विश्वास व्यक्त यानादिल ।

लिसें वयकःपिन्त छुं नं समस्या दुसा ज्यंकेगु नितिं एकेडेमीया कुतलय् पलाः ल्ह्वनेगु खँ धयादिल ।

थः उसाँय् मदयाः छेँय् हे दीम्ह जनकवि श्रेष्ठं नेपालभाषाया छगू प्राज्ञिक संस्था वयाः नापलावःगु खना नुगः लसतां जाःगु धयादिल ।

अथेहे, आख्यानकार सायमिं थःप्रति एकेडेमीं क्यंगु सदाशयताया प्रशंसा यानादिल ।