क्यूआर  कोडया छ्यलाबुला बिस्तार यासेंं नेपाल प्रहरी आम नागरिकया गुनासो, उजुरी, सुझावलिसें प्रहरी सेवालिसे सम्वन्धित विषयय् थःगु सुचं बीज्यूगु क्विक रेस्पोन्स अर्थात क्यूआर कोडया व्यवस्थायात नेपाल प्रहरीं विस्तार यानाहःगु दु ।

प्रहरी महानिरिक्षक बसन्त बहादुर कुँवरं वंगु असोज ६ गते कोशी प्रदेश प्रहरी ज्याकू बिराटनगरय् क्यूआर कोडया प्रयोग सार्वजनिक याःगु लिसेंं थुकिया छ्यलाबुला मेमेगु ज्याकुथिइ नं विस्तार जूगु खः ।

आःतक देय्‌या १८९ प्रहरी ज्याकुथिइ क्यूआर कोड विस्तार जुइधुंकूगु दु । वमध्ये नेपाल प्रहरी प्रधान ज्याकू उजुरी छानविन शाखाय् छगू, स्वनिगः अन्तर्गत १२, कोशी प्रदेश अन्तर्गत २०, मधेश प्रदेश अन्तर्गत छगू प्रहरी ज्याकुथिइ क्यूआर कोडया व्यवस्था दु ।

अथेहे बागमती प्रदेश अन्तर्गत खुगू, गण्डकी प्रदेश अन्तर्गत निगू, लुम्बिनी प्रदेश अन्तर्गत प्यंगू, कर्णाली प्रदेश अन्तर्गत १६, सुदूरपश्चिम प्रदेश अन्तर्गत ११६ ज्याकुथिइ क्यूआर कोडया व्यवस्था दु ।

तथ्याङ्क कथं क्यूआर कोडया व्यवस्था दकले अप्वः सुदूरपश्चिम प्रदेश प्रहरी ज्याकू व मातहतय् खनेदु । क्यूआर कोडया व्यवस्था सम्बन्धय् नेपाल प्रहरीया केन्द्रीय प्रहरी प्रवक्ता प्रहरी नायव महानिरीक्षक भिम प्रसाद ढकालं थ्व सुविधा दुबलय् सेवाग्राही तसकं उत्साहित जूगु थःगु अनुभव कनादिल ।

‘नागरिकया गुनासो, समस्या व रचनात्मक सुझाव मुंकाः कार्यान्वयन यायेत क्यूआर कोडया छ्यलाबुला तसकं प्रभावकारी खनेदु । उकिं नेपाल प्रहरीं क्यूआर कोडया प्रयोगयात मेमेगु प्रहरी ज्याकुथिइ नं बुलुहुं विस्तार याना यंकेगु नीति काःगु दु’ प्रवक्ता ढकालया धापू खः ।

नेपाल प्रहरी प्रधान ज्याकू उजुरी छानविन शाखाय् वंगु असोज २५ गते, काठमाडौं उपत्यका प्रहरी ज्याकूलिसें मातहतय् कात्तिक १८ गतेनिसें, कोशी प्रदेश प्रहरी ज्याकू बिराटनगर नाप मातहतय् २० ज्याकुथिइ वंगु असोज ९ गतेनिसें क्यूआर कोड छ्यलाबुलाय् वःगु खः ।

अथेहे मधेश प्रदेश प्रहरी ज्याकुथिइ वंगु असोज ३० गते, बागमती प्रदेश प्रहरी ज्याकू लिसे मातहतय् वंगु मंसीर २६ गतेनिसें, गण्डकी प्रदेश प्रहरी ज्याकू लिसें मातहतय् वंगु कात्तिक १५ गतेनिसें क्यूआर कार्यान्वयनय् हःगु खः ।

लुम्बिनी प्रदेश प्रहरी ज्याकू नापं मातहतय् वंगु मंसीर ५ गतेनिसें, कर्णाली प्रदेश प्रहरी ज्याकू नापं मातहतय् वंगु कात्तिक २४ गतेनिसें व सुदूरपश्चिम प्रदेश प्रहरी ज्याकू लिसें मातहतय् वंगु असोज १७ गतेनिसें क्यूआर कोड छ्यलाबुलाय् वःगु खः ।

नागरिकया गुनासो क्यूआर कोड मार्फत तप्यंक सम्बन्धित प्रहरी ज्याकू प्रमुखयाय् थ्यनी । गुकिया हुनिं प्राप्त विषयवस्तुया कार्यान्वयन यायेत लिबाइ मखूगु नेपाल प्रहरीया दावी दु ।

नेपाल प्रहरीया कथं क्यूआर कोडया व्यवस्था धुंकाः आःतक मुक्कं १३६ गु उजुरी प्राप्त जूगु दु । व मध्ये ११४ फर्छ्यौट जुइधुंकलसा २२ कार्यान्वयनया चरणय् दु । व मध्ये नेपाल प्रहरी प्रधान ज्याकू उजुरी छानविन शाखां ५९, स्वनिगः अन्तर्गत १४, कोशी प्रदेश अन्तर्गत प्यंगू, बागमती प्रदेश अन्तर्गत च्यागू उजुरी फर्छ्यौट जूगु दु ।

अथेहे गण्डकी प्रदेश अन्तर्गत १४, लुम्बिनी प्रदेश अन्तर्गत गुंगू, कर्णाली प्रदेश अन्तर्गत प्यंगू व सुदूरपश्चिम प्रदेश अन्तर्गत निगू उजुरी फछर्यौट जूगु दु ।

क्यूआर कोड व्यवस्था जूगु प्रहरी ज्याकुथिइ सर्वसाधरणया सहज पहुँच दइगु उपयुक्त थासय् क्यूआर कोड स्क्यान तयागु प्रहरीं धाल ।

कोशी प्रदेश प्रहरी ज्याकू बिराटनगरं ‘गुनासो व्यवस्थापनय् कोशी प्रदेश प्रहरीया क्यूआर कोडया छ्यलाबुला सम्बन्धी कार्यविधि, २०८०’ लागू याःगु दु । थुकी क्यूआर कोडया उद्देश्य व मापदण्ड क्वःछिनाः छ्यलाच्वंगु दु ।

थ्व सम्बन्धय् उगु ज्याकूया प्रवक्ता प्रहरी उपरीक्षक सुमन कुमार तिम्सिनां प्रविधि मार्फत सुचंया स्रोत थकायेमाः धइगु उद्देश्यं क्यूआर कोड संचालन यानागु धयादिल ।

‘थुकिया विस्तार व लोकप्रियतायात प्राथमिकताय् तयाः कार्ययोजना दयेकाः कोशी प्रदेश प्रहरी ज्याकू न्ह्यानाच्वंगु दु । क्यूआर कोड मार्फत वःगु उजुरीइ पूर्ण गोपनियता दइ’ प्रहरी उपरीक्षक तिम्सिनाया धापू खः ।