ख्वपया साहित्यिक संस्था नेपाल साहित्य मन्दिरं थुगुसीया जरिमैंया साखः लुमन्ति सिरपाः सुलोचना मानन्धर धितालयात लःल्हाःगु दु ।

संस्थां नेपालभाषा साहित्य ख्यलय् च्वछायेबहःगु योगदान ब्यूम्ह छम्ह मिसा साहित्यकारयात दँयदसं बियावःगु थुगु सिरपाः थुगुसी वंगु शनिबाः ख्वपय् छगू ज्याझ्वलय् मानन्धर धितालयात लःल्हाःगु खः ।

अथेहे, नेपालभाषा साहित्य ख्यलय् योगदान बियावःम्ह मिजं साहित्यकारयात बीगु कुमार साखः लुमन्ति हःपाः सिरपाः धाःसा विजयरत्न असंबरेयात लःल्हाःगु दु ।

निगुलिं सिरपाःया राशी म्हतिं झिद्वः तका दु ।

नेपाल साहित्य मन्दिरया संस्थापक नांजाःम्ह साहित्यकार तिलक प्रकाश कायस्थं असंबरे व मानन्धर निम्हेसितं सिरपाः लःल्हानादिल ।

उगु हे ज्याझ्वलय् पाल्पा तानसेनया वरिष्ठ भाषिक अभियन्ता छत्र राज शाक्ययात विशिष्ट साहित्य सम्मान ११४५ नं लःल्हाःगु खः ।

उसाँय् मदयाच्वंगुलिं शाक्य ज्याझ्वलय् उपस्थित धाःसा जुइमफूगु खः । ज्याझ्वलय् साहित्य मन्दिरया संस्थापक नायः कायस्थ, व्यवसायी कृष्णलाल प्रधान, विराट गुथिया नायःलिसें नेपालभाषा एकेडेमीया दुजः छ्यान्जे महेन्द्र गोपाल कर्माचार्य व सिरपालं छाय्प्यूपिं निम्ह मानन्धर व असंबरें नुगःखँ तयादीगु खः ।

उगु हे ज्याझ्वलय् सुलोचना साँयजु, हिसिलिना शाक्य, रहिना नकर्मी मानन्धर, बिनिता खडगी, बिना नेमकुल, मन्जु श्रेष्ठ सिंह, मिमला शर्मा, पुर्णिमा शाक्य, दिव्या बज्राचार्य, विमला मानन्धर, मिलन शाक्य, रिता महर्जन व कवयत्री प्रतिसरा सायमिं कविता ब्वनां न्यंकादीगु खः ।

ग्वसाः खलःपाखें नेपाल साहित्य मन्दिरया नायः प्राज्ञ त्रैलोक्यमान बनेपाली अगिब, रामनारायण प्रजापति व उत्तम नारायण प्रधानं थःथःगु बिचाः तयादीगु खः ।