Apexcoder  tech

नेपालभाषा एकेडेमीइ मल्ल न्हूम्ह चान्सलर

eBukhan – बिजयरत्न,    २०८१ माघ २०, आइतबार    वर्गीकृत समाज

नेपालभाषाया साहित्यिक व बौद्धिक ख्यःया प्राज्ञिक संस्था नेपालभाषा एकेडेमीइ न्हूम्ह चान्सलरय् मल्ल के सुन्दर सर्वसम्मत ल्यःगु दु ।

शनिबाः क्वचाःगु एकेडेमीया २४क्वःगु दँमुँज्यां मल्ल सर्वसम्मत चान्सलर चयन जूगु खः ।

मुँज्यां डा. पुष्पराज राजकर्णिकार भाइस चान्सलर, महेन्द्र गोपाल कर्माचार्य दुजः छ्यान्जे व वीर प्रसाद भन्सारीयात दांभरिं ल्यःगु दु ।

अथेहे १० दुजःया प्राज्ञय् प्रा. प्रेमशान्ति तुलाधर, शशीकला मानन्धर, राजेन्द्र महर्जन पुता, राजितबहादुर श्रेष्ठ, विद्या चित्रकार व विजयरत्न असंबरे सर्वसम्मत चयन जूगु दु ।

१५ दुजःया ज्यासना पुचःया लागिं ल्यं दुगु न्याम्ह प्राज्ञय् सहवरण प्रक्रियां निर्मल बज्राचार्य, रजनी मिला, शाक्य सुरेन, तुल्सी सायमि व कृष्णभक्त महर्जन मनोनयन यायेगु निर्णय नवनिर्वाचित ज्यासना पुचःया न्हापांगु मुँज्यां याःगु दु ।

उगु हे मुँज्यां निवर्तमान चान्सलर यज्ञरत्न धाख्वाःयात एकेडेमीया संरक्षक पदय् मनोनयन याःगु दु ।

वयां न्ह्यः दुँमुँज्याय् एकेडेमिया तत्कालीन चान्सलर यज्ञरत्न धाख्वाः, तत्कालीन भाइस चान्सलर मल्ल के सुन्दरलिसें नं एकेडेमीं यानावःगु ज्याखँ, ज्याझ्वः व भावी कार्य योजनाबारे जः ह्वलादीगु खः ।

अथेहे, तत्कालीन दुजः छ्यान्जे डा पुष्पराज राजकर्णिकारं वार्षिक कार्य प्रगति प्रतिवेदन व दांभरिं वीर प्रसाद भन्सारीं आर्थिक प्रतिवेदन न्ह्यब्वयादीगु खः ।