यल महानगरपालिका वडा २१ या वडाध्यक्ष रविन्द्र महर्जनं कलाकर्मी स्वतन्त्र संसार महर्जनयात राष्ट्रपाखें सम्मानजनक विदाई बीकेमफूगु धासें दुःख प्वंकादीगु दु ।

मदुम्ह कलाकःमि स्वतन्त्र संसार महर्जनया श्रद्धान्जलि सभाय् नवासें वडाध्यक्ष महर्जनं स्वतन्त्र थज्याःपिं कलाकार, कासामि वा छुं नं क्षेत्रं देययात योगदान ब्यूपिन्त राज्यं पायछि सम्मान बीमाःगु धासें थथे धयादीगु खः ।

‘कला व कलाकारया उत्थानय् जीवन पाःम्ह स्वतन्त्रयात राज्यस्तरं हे सम्मानजनक विदाई यायेमाःगु खः, गुगु जिं यक्व कुतः यानां नं जुइमफुत । थ्व खँय् जितः तसकं दुःख ताः’ महर्जनया धापू खः ।

यल २१ वडा ख्वनाया कलाकःमि स्वतन्त्र संसार महर्जन वंगु असार २८ गते मदुगु खः । ताः इलंनिसें मेरुदण्डय् ट्युमरं पिडित स्वतन्त्र न्यासि जुइ मफयाच्वंगु खः ।

अथेसां स्वतन्त्र कला क्षेत्रय् निरन्तर सक्रिय जुयाः थीथी ज्याझ्वःत यानावःम्ह खः ।

वंगु श्रावण ९ शुक्रबाः स्वतन्त्रं नीस्वंगु संस्थात संसार क्रिएसन्स नेपाल, संसार फाउन्डेसन नेपाल, संसार्स अनलाईन टिभि व संसार संगीतालयं किपुलिइ श्रद्धान्जलि सभाया ग्वसाः ग्वःगु खः ।

सभाय् संसार संगीतालयया संरक्षक सरिता महर्जन, वरिष्ठ सिने पत्रकार विजयरत्न असंबरे, वरिष्ठ निर्देशक पवन जोशी, वरिष्ठ कलाकार मदनकृष्ण श्रेष्ठं शारिरीक रुपं समस्या दुसां तकं हलिमय् दकले तःधंगु अवार्ड ज्याझ्वःया रुपं विश्व रेकर्ड कायम यायेत स्वतन्त्रं याःगु आँट व सुरुवातया प्रशंसा यानादिल  ।

मदुम्ह कलाकःमि स्वतन्त्रं हलिमय् दकले यक्व विधाया व दकले ताःहाकःगु अवार्ड ज्याझ्वःया रुपं विश्व रेकर्ड तयेगु धासें स्टार म्यूजिक भिडियो अवार्डया सुरुवात यानादीगु खः ।

राष्ट्रिय अवार्डया रुप बियाः थुगु अवार्डया स्वक्वःगु संस्करण वंगु जेठ ३ गते क्वचाःगु खः ।

ज्याझ्वलय् न्ववायेगु झ्वलय् कलाकार मनोज महर्जनं स्वतन्त्र थःगु प्रेरणाया श्रोत खःगु धासें हलिमय् दकले तःधंगु अवार्ड कथं विश्व रेकर्ड कायम यायेगु स्वतन्त्रया म्हगस पूवंकेत सकलें छधी जुइत आह्वान यानादिल ।

मदुम्ह कलाकःमि स्वतन्त्रं थीथी स्थानीय गतिविधि कःघानाः समाचारमूलकया नापं म्यूजिक भिडियोलिसेंया मनोरन्जनात्मक न्ह्यब्वया न्ह्यब्वसें संसार्स अनलाइन टिभि युट्युब च्यानल न्ह्याकूगु खः ।

संसार क्रिएसन्सपाखें स्टार म्यूजिक भिडियो अवार्डलिसें थीथी सांगितिक व मनोरन्जनात्मक ज्याझ्वः यानावःगु खः ।

अथेहे, संसार संगीतालयं साप्ताहिक रुपं थीथी कलाकारपाखें सांगितिक न्ह्यब्वया न्ह्यब्वयावःगु खःसा संसार फाउन्डेसनपाखें थीथी सामाजिक गतिविधित यानावःगु खः ।