येँया खुसिबुँस्थित काठमाडौं मोडल स्कूलं शिक्षासेवी नातिकाजी महर्जनयात सम्मान याःगु दु ।

येँया जमःस्थित राष्ट्रिय नाचघरय् जूगु स्कूलया दिक्षान्त समारोहस प्रभात मा.वि. या पूर्व शिक्षकलिसें मोडल स्कूल व्यवस्थापन समितिया पूर्व नायः महर्जनयात हंगु खः ।

ज्याझ्वलय् ज्ञानोदय मा.वि. या पूर्व प्रधानाध्यापक नातिकाजी महर्जनं शिक्षासेवी महर्जनयात हनादिल । पूर्व प्रधानाध्यापक महर्जनं दोसल्ला न्ययेकादिल सा स्कूलया निर्देशक राजेन्द्र महर्जनं हनापौ लःल्हानादिल ।

ज्याझ्वलय् स्कुलया पूर्व–प्राथमिक तह, आधारभूत तह व माध्यमिक शिक्षा परीक्षा ताःलाःपिं विद्यार्थीतयत नं सम्मान याःगु खः । उगु हे ज्याझ्वलय् स्कूलया शिक्षकतयत दीर्घ सेवा सम्मान नं ब्यूगु खः ।

थःगु खँ तसें स्कूलया शिक्षक लिसें अनुवादक ओमप्रकाश खरेलं विद्यार्थीतयत ल्यापटप, मोबाइललिसें प्रविधिं तापाकेगु स्वयां सदुपयोग यायेगु स्यनाबीत अभिभावकयात छ्याता बियादिल ।

‘थौंया इलय् मोबाइल, ल्यापटप थीके मबियां जी ला ? थुकिं हे गुलि खँ सीकेफइ, सयेकेफइ । प्रविधिं तापाकेगु मखु, थुकियात पायछि कथं छ्यलेगु मचातयत स्यनाबियादिसँ बरु’ शिक्षक खरेलं धयादिल ।

स्कूलया निर्देशक राजेन्द्र महर्जनं किताबी आखः जक स्वयां व्यवहारिक ज्ञान, नैतिक शिक्षा मचातयत बीगु नितिं शिक्षक व अभिभावकं कुतः यायेमाःगुलिइ बः बियादिल ।

ज्याझ्वलय् स्कूलया विद्यार्थीतयसं शिव ताण्डव, के पप, फ्लेमिङ्गो, मार्सल आर्ट डेमो, अर्केस्ट्रा लिसेंया न्ह्यब्वया न्ह्यब्वःगु खः ।