किपूया नांजाःम्ह म्येहालामि रत्नशोभा महर्जनलिसें राजेश महर्जन नेवालं हालादीगु ‘का नु वने जिम्थाय् मैंचा’ म्येया म्यूजिक भिडियो सार्वजनिक जूगु दु ।

शनिबाः किपूया कीर्तिपुर सिनेप्लेक्सय् जूगु ज्याझ्वलय् उगु म्येया म्यूजिक भिडियो सार्वजनिक जूगु खः ।

उगु हे ज्याझ्वलय् ज्याझ्वलय् म्येहामि राजेश महर्जन नेवाःया गुरुपिं थांबहाः दाफा खलःया दाफा म्ये गुरु चक्रमान महर्जन व बाजं गुरु चिरिभाई महर्जन ‘हाकुम्ह गुरुबा’ यात गाचां न्ययेकाः तकालिसें हंगु नं खः ।

थांबहाः दाफा खलः व नेवाः लहना किपूया ग्वसालय् जूगु ज्याझ्वलय् बरिष्ठ संगीतकःमिलिसें संगीत अन्वेषक रामकृष्ण दुवाल, लोककवि राजभाई जकःमि, बरिष्ठ संगीतकःमि जुजुकाजी रंजितलगायतया उपस्थिती दुगु खः ।

अथेहे किपूया बरिष्ठ संगीतकःमि ज्ञानेश्वर निभाः, नेवाः लहनाया नायः राजमान मानवलिसें वरिष्ठ सिने पत्रकार विजयरत्न असंबरे व थांबहाः दाफा खलःया कजि लिसें किपू नगरया पुलांम्ह नगर प्रमुख रमेश महर्जनया नं उपस्थिती दुगु खः ।

सार्वजनिक जूगु म्येया च्वमि व लयचिनामि नं हालामि राजेश हे खः । मनोजरत्न शाहीं छायाङ्कन व दृश्य सम्पादन यानादीगु म्यूजिक भिडियोलय् कलाकार राष्ट्रिका शाक्य व अनुज शाक्यया मू भूमिका दु ।

म्यूजिक भिडियोया निर्देशन राजन शाहीं यानादीगु दु ।

थुगु म्येया म्यूजिक भिडियो ज्योति म्यूजिक युट्युब च्यानलय् अपलोड जूगु दु ।