येँ महानगरपालिका २३ वडाय् दुगु बहाःबहीया जानकारी आः क्यूआरकोड मार्फत कायेफइगु जूगु दु ।

थौं येँ महानगरपालिकाया उपप्रमुख सुनिता डंगोलं उगु क्यूआर कोड प्रणालीया शुभारम्भ यानादिल ।

येँया बसन्तपुलिइ जूगु छगू ज्याझ्वःया दथुइ येँ मपा उपप्रमुख डंगोल क्यूआर कोड प्रणालीया शुभारम्भ यानादिल ।

ज्याझ्वलय् उपप्रमुख डंगोलं स्थानीय संस्कृति, सम्पदाया संरक्षण व प्रवर्ध्दनया लागिं प्रविधिलिसे न्ह्याःवनेमाःगुलिइ बः बियादिल ।

‘झीसं आधुनिकतायात नं नालाकयाः झीगु ऐतिहासिक संस्कृति, सम्पदाया संरक्षण यायेमाः । झीगु संस्कृति सम्पदाया संरक्षणया लागिं पुस्तान्तरण जुइमाः व थुकिया लागिं विज्ञान व प्रविधिया ग्वहालि काये हे माः’ डंगोलं धयादिल ।

सम्पदाया जानकारी बीगु क्यूआर कोड न्ह्याःगुलिसें पुर्खां दयेकूगु सम्पदा अन्तर्राष्ट्रियकरण यायेत अःपुइगु लिसें थुकिया अन्तर्राष्ट्रिय स्तरय् अध्ययन अनुसन्धानं नं व्यापकता काइगु विश्वास डंगोलं प्वंकादिल ।

ज्याझ्वलय् न्ववासें येँ मपा २३ वडाया वडाध्यक्ष मचाराजा महर्जनं स्थानीय सम्पदा न्हूगु पुस्ताय् पुस्तान्तरण यायेगु परिकल्पनालिसें थुगु प्रणालीया विकास यानागु धयादिल ।

‘सम्वर्धन संस्था’ या प्राविधिक ग्वहालिं येँ मपा २३ वडां थुगु क्यूआर कोड प्रणालीया विकास याःगु खः ।

ज्याझ्वलय् सम्वर्धन संस्थाया न्वकू सुरेश प्रसाद श्रेष्ठं थ्व कथंया प्रणाली विकासय् थःपिं न्हाप मखुसां विस्तृत सोध अनुसन्धानलिसेंया प्रणाली धाःसा न्हापांगु जूगु दावी यानादिल ।

ईतिहासया गहन अध्ययन, स्थलगत अनुसन्धान, श्रव्यदृश्य जानकारीलिसें थुगु क्यूआर कोडया विकास यानागु न्वकू श्रेष्ठं जानकारी बियादिल ।

‘हलिमय् गनं मदुगु मूर्त अमूर्त सम्पदा, कला, संस्कृतिया खानी नेपाल खःसां थुकिया बारे तथ्य जानकारी धाःसा सिमित खनेदु । थ्व परियोजनां झीगु सम्पदा, कला, संस्कृतिया बारे तथ्य जानकारी स्वदेशी अले विदेशीतयत बीगु माध्यमया रुपं ज्या याइ’ न्वकू श्रेष्ठं धयादिल ।

थ्व क्यूआर कोड प्रणालीइ २३ वडाया बहाःबहीया श्रब्यदृश्यलिसें नेपाली व अंग्रेजी निगुलिं भाषाय् जानकारी कायेफइगु धाःगु दु ।

इतिहासविद् डा. जुनु बासुकलां इतिहास सम्वन्धि अध्ययन यानाः मुंकादीगु दस्तावेजया लिधंसाय् थुगु क्युआर कोड प्रणाली विकास जूगु येँ मपा २३ वडां न्ह्यथंगु दु ।