जल प्याखंया मूद्यः बेखाबहादुर मन्त
eBukhan – बिराज, २०८० फाल्गुण ४, शुक्रबार वर्गीकृत तजिलजि
हरिसिद्वि भवानीया द्यःगण लिसें जल प्याखं (हरसिद्वि भवानी प्याखं) या त्रिदेवमध्येया छम्ह मूद्यः बेखाबहादुर महर्जन ‘मूद्यः’ मन्त ।
हरसिद्वि मू गुथिया न्वकू तकं खःम्ह ८९ दँ दुम्ह बेखाबहादुर बिहिबाः थःगु हे छेँ हरसिद्धिइ मदुगु खः ।
ल्वय् वा छुं कथंया स्वास्थ्य समस्या खास हे छुं मदुम्ह वयकः बिहिबाः आकाझाकां मदुगु हरसिद्धीया स्थानीय संचारकःमि बि.के. जल्मीं जानकारी बियादिल ।
संचारकःमि जल्मीया कथं वंगु पोहेंलाथ्व पुन्हि (माघ ११ गते) जूगु मू गथिया भ्वजय् वयकः झाःगु दुगु खः ।
वयकःया म्हिगः हे हरसिद्धिइ अन्त्येष्टि क्वचाःगु दु । वयकःयात तःधिकःम्ह काय् शान्त गोविन्द महर्जनं मि तयादिल ।
वयकःया स्वक्वःगु जंक्व देवरथारोहण न्ह्यःने थ्यनाच्वंगु खः । तर आकाझाकां वयकः मदुबलय् वयकःया स्वक्वःगु जंक्व धाःसा जुइमफुत ।
वयकःया जहान ७२ सालया भुखाचय् लानाः मदुगु खः । वयकःया परीवारय् निम्ह काय् शान्त गोविन्द व सुरोज महर्जन दी ।