नेपाल आदिवासी जनजाति पत्रकार महासंघं (फोनिज) नेपाल पत्रकार महासंघं गलत तथ्यय् चुयाः गौरव कायम याये मफइगु धासें महासंघया संस्थापक नायः कथं सत्यनारायणबहादुर श्रेष्ठया नां कायम यायेत माग याःगु दु ।

फोनिजं मंगलबाः नेपाल पत्रकार महासंघयात स्मरणपौ लःल्हासें वि.स.ं २००८ साल जेठय् नेपाली पत्रकारतयत न्हापांगु खुसी संगठित याःम्ह मदुम्ह श्रेष्ठयात महासंघया संस्थापकनायः कायम यायेत माग याःगु खः ।

फोनिजया केन्द्रीय नायः गजुर्धन राईं पत्रकार महासंघया केन्द्रीय नायः विपुल पोखरेलयात आन्दोलनया अल्टिमेटमलिसें स्मरणपत्र लःल्हाःगु खः ।

मदुम्ह श्रेष्ठयात महासंघया संस्थापक नायः कायम यानाः इतिहासयात सम्मान यायेत माग यासें फोनिजं थगुने पत्रकार महासंघ जिल्ला, प्रदेश व केन्द्रय् ज्ञापनपौ बीधुंकूगुलिं मंगलबाः लःल्हाःगु पौयात स्मरणपौ धाःगु खः ।

स्मरण पौ लःल्हानाकासें पत्रकार महासंघया नायः पोखरेलं पत्रकार महासंघया नं गलत तथ्यय् च्वने मयःगु धासें प्राप्त तथ्य व दसिया लिधंसाय् इतिहास भिंकेत पक्षय् दुगु धयादिल ।

‘आःया विधानं मदुम्ह कृष्णप्रसाद भट्टराईयात महासंघया संस्थापक नायः धाःगु दु । थुकिया दथुं इतिहास सही या गलत छु खः धइगु विषयस विज्ञतलिसेंया टोलीयात अध्ययन याकाः निर्णयलय् वने न्यायपूर्ण जुइ’ नायः पोखरेलया धापू खः ।

नायः पोखरेलं महासंघया वइगु फागुन १९ गतेया मुँज्याय् थ्व विषयस सहलह यायेगु प्रतिबद्धता नं प्वंकादिल ।

थ्वयां न्ह्यः फोनिजया नायः राईं फोनिजया माग कथं छवाः दुने मदुम्ह श्रेष्ठयात महासंघया संस्थापक कायम यायेगु प्रक्रिया मन्ह्याकूसा देशव्यापी आन्दोलनय् कुहांवयेगु चेतावनी बियादिल ।

व इलय् महासंघया वरिष्ठ उपाध्यक्ष रमेश विष्ट, महासचिव रोशन पुरीं फोनिजया छ्याता व माग कथं महासंघं अध्ययन समिति दयेकाः इतिहास व संस्थापकबारे निर्णय यायेत तयार दुगुलिं दबाब ज्याझ्वः मयायेत फोनिजयात इनाप यानादिल ।

महासंघ महाधिवेशनया संघारय् दुगुलिं आन्दोलन, तालाबन्दी थुज्वःगु ज्याखँ फोनिजं यायेमज्यूगु वयकःया धापू खः ।

स्मरणपौ लःल्हायेत फोनिजया पदाधिकारी व संघीय दुजःलिसें नेवाः पत्रकार राष्ट्रिय दबूया केन्द्रीय नायः नृपेन्द्रलाल श्रेष्ठलिसेंया टोली वंगु खः ।

वार्ताय् वयेत इनाप

महासंघया महासचिव रोशन पुरीं फोनिजयात पौ च्वयाः वार्ताया माध्यमं समस्या ज्यंकेत इनाप यानादीगु दु ।

फोनिजया अल्टिमेटमलिसेंया स्मरणपत्रं महासंघया गम्भीर ध्यानाकर्षण जूगु धासें पुरीं वार्ता व संवादय् वयेत फोनिजयात इनाप यानादीगु खः ।

‘थ्व विषययात वार्ता व संवादमार्फत निश्चित विधि क्वःछीनाः लिच्वलय् थ्यंकेमाःगु महासंघया निष्कर्ष दु । अयजूगुलिं घोषित आन्दोलनया ज्याझ्वः लित कयाः वार्ताय् वयेत दुनुगलंनिसें इनाप दु’ पत्रय् च्वयातःगु दु ।