पाकिस्तान आम निर्वाचनया छम्ह विजयी नेतां थःत धांधली यानाः त्याकुगु धासें थःगु जित बहिस्कार याःगु दु ।

जमात–ए–इस्लामि पार्टिं कराँची शहरको प्रान्तीय विधानसभा सीट पीएस–१२९ या विजेता हफिज नइम उर रेहमानं थथे धासें थःगु जित वहिस्कार याःगु खः ।

नेता रहमानं थः प्रतिद्वन्दी इमरान खानया पार्ति पाकिस्तान तेहरिक–ए–इनसाफ (पिटिआई) या उम्मेद्वारं थः स्वयां अप्व मत हःगु तर धांधली याना वयागु मत ल्याः म्ह्वः क्यनाः थःत त्याकाब्यूगु धाल ।

‘धांधली यानाः जितः त्याकेगु सुनां नं स्वःसा अज्याःगु जित जिं स्वीकार यायेमखु । जनताया मतया कदर यायेमाः, त्याःम्हेसित त्याकेब्यु, बूम्हेसित बुइब्यू, सुयात नं छुं नं अप्व मदयेमा’ सोमबाः पार्टिं याःगु प्रेस कन्फरेन्सय् रेहमानं धयादिल ।

वय्कःया कथं स्वतन्त्र प्रतिद्वन्दि सैफ बरिया ३१,००० मतयात ११,००० क्यनाः थःगु २६,००० मतयात बिजयी घोषणा यानाब्यूगु खः ।

पूर्व प्रधानमन्त्री इमरान खानयात थगुनेनिसें कारागारय् कुनाः वयकःया पार्टीयात चुनावय् उम्मेदवारी बीगुलिइ पंगः तःगु खः, उकिं याना पिटीआईया उम्मेदवारत स्वतन्त्र रुपय् चुनावय् दनेमाःगु खः ।

पाकिस्तानी निर्वाचन आयोगं थःत ब्यूगु थ्व द्वपंया खण्डन याःगु दु ।

रहमानया थःगु जित वहिष्कार व निर्वाचनया आयोगया खण्डन धुंकाः पिएस–१२९या विजेता सु धइगु धाःसा अन्यौलया स्थिती जूगु दु ।