नेपालभाषाया दर्शन म्ये ‘देवा च्याके धुपाँय् च्याके’या म्यूजिक भिडियो पितब्वज्या जूगु दु ।

येँय् जूगु छगू ज्याझ्वःया दथुइ थुगु म्यूजिक भिडियोया पितब्वज्या पूर्व राजदूत डाक्टर अन्जान शाक्यं यानादिल ।

ज्याझ्वलय् न्ववासें पूर्व राजदुतलिसें म्येहालामि तकं खःम्ह शाक्यं समाजय् ह्यूपाः हयेगु नितिं संगीत नं छगू सशक्त माध्यम खः धासें थुगु म्यें नं समाजय् सकारात्मक हसना ह्वलीगु खँय् विश्वास प्वंकादिल ।

ज्याझ्वलय् म्येच्वमि संघरत्न शाक्य, संगीतकार मनराजा नकःमि व म्यूजिक भिडियो निर्देशक रवि सायमिलिसें नं नुगःखँ तयादीगु खः ।

पितब्वज्या जूगु म्येय् म्येहालामि बबिता मानन्धरं सः बियादीगु दु ।

म्यूजिक भिडियोलय् शोभा महर्जन, रेश्मी महर्जन, निरोज शाक्य, रुपेश डंगोललिसें तःम्ह हे कलाकारपिन्सं अभिनय यानादीगु दु ।

छायाङ्कनया ज्या भवानी शिलाकार व रोमन मार्सं यानादीगु दु । म्येच्वमि शाक्यया हे परिकल्पनाय् निर्देशनया नापं दृश्य सम्पादनया ज्या रवि सायमिं यानादीगु दु ।