यल तलेजुया मूल पूजारी अनन्त ज्वालानन्द राजोपाध्याय मन्त ।

छुं ई न्ह्यःनिसें म्हं मफयाच्वंम्ह राजोपाध्याय शनिबाः ८७ दँया उमेरय् मदुगु खः । पाटन अस्पतालय् शनिबाः सनिलया ५ताः इलय् वयकः मदुगु खः ।

उसाँय् बांमलाना वनेवं वंगु पुस १२ गते विहिबाः वयकःयात वासः यायेगु नितिं पाटन अस्पतालय् भर्ना याःगु खः । व हे अस्पतालय् उपचारया झ्वलय् वयकः मदुगु खः ।

२०७६ सालय् स्ट्रोक जुइधुंका वयकःया म्हया देपा ब्व चले मजुयाच्वंगु खः । लिपांगु इलय् वयाः वयकःया हरेक अंगं ज्या यायेगु त्वःतावंगु खः ।

शनिबाः बहनी हे यल शंखमूलय् वयकःया अन्त्येष्टि याःगु दु । वय्कःया तःधिकःम्ह काय् महेश ज्वालानन्द राजोपाध्यायं वयकःयात मि तःगु खः ।

राजोपाध्यायया जहानलिसें निम्ह काय् व निम्ह म्ह्याय् दु ।

वयकःयात २०७० चैत्र २३ गते यल तलेजुया मूल पूजारी नियुक्त याःगु खः ।

राजोपाध्याय मदये धुंका आः यल तलेजुया मूल पूजारी सु जुइगु धइगुबारे पूजारीतय् मुँज्या च्वनेधुंका क्वःछीगु तलेजुया छम्ह पूजारी रक्षण राजोपाध्यायं जानकारी बियादिल ।

उमेरया ल्याखं थकालि लिसें त्यपु निम्हं दिक्षित जुइमाःगु लिसेंया मापदण्डया आधारय् मूल पूजारी ल्यइगु जानकारी पूजारी रक्षणं बियादिल ।