चन्द्रागिरि नगरपालिकाय् ‘वसः (कपडा) बैङ्क’ या शुभारम्भ जूगु दु ।

चन्द्रागिरि नगरपालिकाया आर्थिक ग्वहालिइ न्ह्याःगु ‘क्लोथ’ बैङ्क’या नगर प्रमुख घनश्याम गिरी, नगर प्रवक्ता कृष्ण प्रसाद खड्गी, प्रमुख प्रशासकीय अधिकृत हेमराज अर्याल र अभिनेता राजेश हमालं उलेज्या यानादिल ।

सोमबाः जूगु वसः बैंक उलेज्या ज्याझ्वलय् न्ववासें नगर प्रमुख गिरिं वसः बैङ्कयात वइगु दिनय् थप प्रबर्द्धन यायेत वडा तगिमय् विस्तार यायेत नगरपालिकां फक्व ग्वहालि यायेगु प्रतिवद्धता प्वंकादिल ।

अभिनेता हमालं वसः बैङ्कलिसें नसा बैङ्क स्थापनाया नं तयारी जुयाच्वंगु जानकारी ब्युसें वसः बैङ्कं विपन्न समुदाययात लबः दइगु धयादिल ।

छ्यलाबुलाय् मवःगु वसः व झोलात नगरपालिकाया मू ध्वाखाय् दुगु ‘वसः बैङ्क’य् यंकाः तयेफइसा मुंगु वसः व झोला बैङ्कं रिसाइकल याइ ।

रिसाइकल जूगु वसः व झोलायात आकर्षक ‘प्याकेज’ यानाः बैङ्कं थःगु ‘शो रुम’तय् तइगु व आवश्यक जूपिं न्ह्याम्हेसिनं नं ‘शो रुम’य् वनाः थज्याःगु वसः व झोला सितिकं कायेफइगु धाःगु दु ।

लिसें बैङ्कं विपन्न व गरिब वर्गयात छेँय् छेँय् हे वनाः वसः व झोला वितरण न्ह्याकेधुनागु धाःगु दु ।

स्वनिगः दुने ‘वसः बैङ्क’ न्ह्याःगु चन्द्रागिरि निगूगु नगरपालिका खः ।