नेपाःया लिसें भारतया संकिपा ख्यलय् तकं नं यक्व हे नेवाः कलाकारपिनिगु योगदानया चर्चा जूगु दु । येँय् जूगु छगू ज्याझ्वलय् थुकथंया चर्चा जूगु खः ।

म्येहालामि पुरुषोत्तम श्रेष्ठं हालादीगु म्ये ‘सुथसिया निभाः’ या कभर कासा ‘सुथसिया निभाः म्ये कासा’या ब्वतिमितयत दसिपौ लःल्हायेगु ज्याझ्वः वंगु शनिबाः येँय् जूगु खः ।

उगु हे ज्याझ्वलय् न्ववासें वरिष्ठ निर्देशक लिसें साहित्यकार प्रकाश सायमिं नेपाःयालिसें भारतया संगीत ख्यलय् तकं नेवाः कलाकारतय् तःधंगु व महत्वपूर्ण योगदान दुगु धयादिल ।

‘सुषमा श्रेष्ठं बलिउडय् पूर्णिमाया नामं म्ये हालाच्वंगु दु । नेपाःया संगीत क्षेत्रय् नं प्रेमध्वज प्रधान, नारायण गोपाल, मेलवादेवी, तारादेवी थज्याःपिं नेवाः म्येहालामिपिनिगु भूमिका व योगदान सकसिनं स्यूगु हे खँ जुल’ वरिष्ठ निर्देशक सायमिं धयादिल ।

ज्याझ्वलय् न्ववासें वरिष्ठ म्येहालामि भीम तुलाधर, संचारकःमि लिसें म्येहालामि सुरजबीर बज्राचार्यं संगीत ख्यलय् जुयाच्वंगु थीथी कथंया कासां न्हून्हूपिं प्रतिभायात पिब्वयेत तिबः व ग्वाहालि जुइगु बिचाः तयादिल ।

म्येहालामि पुरुषोत्तम श्रेष्ठं प्यदँ दुम्ह मचानिसें ७६दँ दुम्ह जिथिम्हेसिनं तकं थःगु म्ये हाःगु न्यनाबलय् थः तसकं लयताःगु धयादिल । लिसें कासाया सकल ब्वतिमितयत म्येहालामि श्रेष्ठं सुभाय् नं देछानादिल ।

कासाया ग्वसाः खलः कन्फराक्टीभ मिडिया सोलुसनया नायः लिसें कासा कजि बिराजकाजी राजोपाध्यायं कासाया त्याकामि घोषणा ज्याझ्वः स्वन्ति जःखः यायेगु जानकारी बियादिल । संगीत व गायन ख्यलय् न्हूपिं प्रतिभा मालेगु व नेवाः संगीत ख्यःयात क्रियाशील दयेकातयेगु आज्जुं कासाया ग्वसाः ग्वयागु धयादिल ।

ज्याझ्वलय् सुथसिया निभाः म्ये कासाया ५७म्ह ब्वतिमितयत दसिपौ लःल्हाःगु खः । वरिष्ठ निर्देशक लिसें साहित्यकार सायमी, वरिष्ठ म्येहालामि तुलाधर, संचारकःमि लिसें म्येहालामि बज्राचार्य व वरिष्ठ संगीतकार बुद्ध सायमीलिसें नं ब्वतिमितयत दसिपौ लःल्हानादीगु खः ।