द्वाल्खा बुंगद्यःया जात्राया झ्वलय् थौं हाकनं सेंगः त्वालं रथयात त्वाथलं क्वकयाः दुङ्गल त्वालय् थ्यंकूगु दु ।

म्हिगः सेंगु त्वालय् सालायंकूगु रथयात थौं हाकनं ६० डिग्रिया त्वाथलं क्वतहयाः दुङ्गल त्वालय् थ्यंकाःलि याः न्यायेकूगु खः ।

वयां न्ह्यः म्हिगः टसिचा त्वालं रथयात्रा न्ह्याकाः ६० डिग्रिया त्वाथलं च्वय् रथ सालायंकाः सेंग त्वालय् थ्यंकूगु खः ।

द्वालखाया बुंगद्यःया रथयात्राया झ्वलय् थुकथं त्वाथलं रथयात च्वय् सालायंकेगु व क्वय् सालाहयेगु अवसरयात मू आकर्षणया रुपय् कायेगु याः ।

थुगु जात्रा स्वयेत येँ, यल, ख्वप, किपू, धौख्यः, बनेपा लिसेंया थासं मनूत द्वालखा थ्यनेगु याः । यलया छुं स्थानीयं थुगु जात्राय् नामसंगति पाठ लिसें भजन याःवनेगु नं यानाच्वंगु दु ।

न्हापा बुंगद्यःया रथ थुकथं त्वाथलं च्वय् सालायंकेगु चलन मदुगु व लिपा च्वय्या त्वाःया स्थानीयं बुंगद्यः थःगु त्वालय् सालाहःसा लुँया स्वां छायेगु बचं ब्यूबलय् थ्व परम्परा न्ह्याःगु स्थानीय ज्याथःजिथितय् धापू दु ।

द्वाल्खाया छुं नं जात्रापर्वय् म्वाय्लि अनिवार्य पुइमाःगु चलन दु ।

द्वालखाय् वंगु बैशाख ११ गते बुंगद्यःया न्हवं यायेधुंकाः औपचारिक रुपं जात्रा न्ह्याःगु खः ।