नेवाः देय् दबू ख्वप जिल्लाया नवनिर्वाचित नायः नरेश श्रेष्ठं ख्वप नगरपालिकाय् ब्वनेकूया स्थानीय पाठ्यक्रम नेपालभाषां हे ब्वंकेबीगु नितिं जानाच्वनागु धयादीगु दु ।

देय् दबू ख्वप जिल्लाया कार्यसमितिइ निक्वःगु खुसी नायः निर्वाचित श्रेष्ठं ईबुखँलिसे खँ ल्हासें थथे धयादीगु खः ।

सम्भवतः नेपाःया हे न्हापांगु स्थानीय पाठ्यक्रम आः खय् भाषां ब्वंकावःगुलिइ थःपिन्सं उकियात नेपालभाषां अनुवाद याकेगु नितिं नगरपालिकालिसे समन्वय यानाच्वनागु धयादिल ।

‘सम्भवत ख्वप नगरपालिकाया स्कूलय् ब्वंकावःगु स्थानीय पाठ्यक्रम खय् भासं दुगुलिइ उकियात अनुवाद यानाः नेपालभाषां ब्वंकेमाल धकाः झीसं दबाब बियाच्वनागु दु । वयकःपिं नं सकारात्मक हे दु, अनुवादया नितिं झीत ग्वाहालि यायेत इनाप यानादीगु दु’ नायः श्रेष्ठं धयादिल ।

नेवाः देय् दबू ख्वप जिल्लाया दँमुँज्या वंगु शनिबाः ख्वपय् क्वचाःगु खः । दँमुँज्यां श्रेष्ठयात सर्वसम्मतिइ निक्वःगु खुसी नायः ल्यःगु खः ।

ईबुखँलिसे खँल्हाबल्हाया झ्वलय् श्रेष्ठं थःगु न्हापांगु कार्यकाल सुथांलाःगु दावी नं यानादिल ।

आदिवासी अधिकारया विषयस ख्वपय् सचेतना थनेगु, ल्यायम्ह पुस्ता दथुइ नेपालभाषाया जागरण हयेगुलिसें थीथी ज्यात यानाः न्हापांगु कार्यकाल सुथांलाःगु वयकलं धयादिल ।

आर्थिक पक्ष बमलाःगु हुनिं योजना दुनेया गुलिखे ज्या यायेमफूगु वयकलं स्वीकार यानादिल । थुगुसी मंकाः अक्षय कोष दयेकागु जूगुलिं न्हापा स्वयां अझ बांलाक ज्या यायेफइगु वयकलं धयादिल ।

‘न्हापा जूसा छुं ज्या यायेमालकि दक्वसिनं धेबा ल्हायेमालीगु अवस्था दुगु खः । आः मंकाः अक्षय कोष दुगुलिं ज्या यायेत अःपुइ व न्हापा स्वयां बांलाक ज्या यायेफइगु अवस्था दु’ नायः श्रेष्ठं धयादिल ।

ख्वपय् थीथी संघसंस्था दुसां नेवाः हक अधिकारया लागिं ज्या याइगु संस्था देय् दबू जूगुलिं सकल ख्वपमि नेवाःतयत देय् दबू ख्वप जिल्लाया दुजः जुयाः नेवाः उत्थानय् न्ह्यज्यायेत, नेवाः अधिकारया आन्दोलनलिसे स्वायेत वयकलं इनाप यानादिल ।

शनिबाः क्वचाःगु दँमुँज्यां जगतकृष्ण श्रेष्ठ (पाद्या) यात वरिष्ठ न्वकू ल्यःगु दुसा शिवराम दुवालयात न्वकू व मिसा न्वकुलिइ रीना लाखेयात ल्यःगु दु ।

सर्वसम्मतिइ निर्वाचित ज्यासना पुचलय् छ्यान्जेया भाला जीवनपति श्रेष्ठयात व मिसा छ्यान्जेया भाला लक्ष्मीदेवी श्रेष्ठयात ब्यूगु दु ।

दांभरिं पदय् योगी स्यस्यःयात ल्यःगु दु । ज्यासना पुचःया च्याम्ह दुजः नं सर्वसम्मतिइ हे ल्यःगु दु ।

१४ तक दुजः मनोनित यायेदइगु व्यवस्था विधानं याःगु दुसां भविष्यय् आवश्यकता व दुजःतयगु सक्रियता स्वयाः माःकथं दुजः मनोनित यायेगु नायः श्रेष्ठं धयादिल ।