वांङ्गमय शताब्दी पुरुष  लोकसाहित्यविद् डा. सत्यमोहन जोशीया १०६क्वःगु जन्म जयन्ती थुगुसी नं छवाःयंक हनीगु जूगु दु ।

लोक साहित्य परिषदं छवाः यंक थीथी ज्याझ्वः यासें शताब्दी पुरुष जोशीया बुदिं हनेत्यंगु खः ।

व झ्वलय् शताब्दी पुरुष जोशीं नीस्वनादीगु लोक साहित्य परिषदया भवन बखुंबहाल बुधबाः सफू ब्वज्या न्ह्याःगु दु । उगु सफू ब्वज्या थौं नं जुयाच्वंगु दनि ।

वैशाख २६ गते शुक्रबाः बखुङबहालय् हे संग्रहालय अवलोकन ज्याझ्वः तयातःगु दु । अथेहे, वैशाख २७ गते शनिबाः नेपालभाषा एकेडेमिया ग्वसालय् येँया राष्ट्रिय सभागृहया हलय् ज्ञान सम्मेलन ज्याझ्वः तयातःगु दु ।

वैशाख २८ सोमबार परिषदया भवन बखुंबहालय् १०६ प्वाः मत च्याकेगु परिषदया ज्याझ्वः दु ।

जन्म जयन्ती हनेगु झ्वलय् वैशाख २९ गते सोमबाः न्हिनसिया २ताः इलय् बखुंबहालय् चिबाखं च्वमि भाजु नरेश अमात्यया एकल बाखं वाचनया ज्याझ्वः जुइगु जूगु दु ।

छवाःयंकं जन्मजयन्ती हनेगु झ्वलय् वैशाख ३० गते मङ्गलबाः सुथय् यलया लबिम मलया हलय् वाङ्गमय शताब्दी पुरुष सत्यमोहन जोशीं च्वयादीगु नाट्य कृृति ‘बैद्यबाः’ बाखनय् आधारित संकिपा ‘बैद्यबा’ या प्रिमियर शो जुइत्यंगु दु ।

व हे दिनकुन्हु ‘नेवाः मुक्कं खँग्वः मुना सफू’यालिसें अष्टगणेश अनुसन्धान केन्द्रया पिथना कथं न्यागू सफूया नं पितब्वज्या जुइत्यंगु परिषदया नायः राजित बहादुर श्रेष्ठं जानकारी बियाद्यूगु दु ।