असंया अशोक चैत्य महाविहार असं बहाःया द्यःछें उलेज्या जूगु दु ।

सोमबाः छगू ज्याझ्वःया दथुइ येँ महानगरपालिकाया प्रमुख बालेन साहं द्यःछेँ उलेज्या यानादिल । येँ महानगरपालिका प्रमुख साहं त्वाःदेवाय् मत च्याकेगुया नापं ल्वहँपौ उलेज्या व रिबन चानां द्यःछेँया उलेज्या यानादीगु खः ।

ज्याझ्वलय् असंबहाःया थकालि आजु द्रव्यरत्न शाक्य, येँ महानगरपालिका प्रवक्ता नबिन मानन्धर, बौद्ध विद्वान प्रा डा नरेशमान बज्राचार्य, येँ महानगरपालिका सम्पदा विभाग प्रमुख कुमारी राईया उपस्थिति दूगु खः ।

लिसें येँ मपा वडा २७ या अध्यक्ष योगेश खडगी, शाक्य महाविहार संघया अध्यक्ष शुभकाजी शाक्य व महासचिव संघरत्न शाक्य व थी थी बहाः या दुजःतय् उपस्थिती दुगु खः ।

चैत्यया ऐतिहासिक, धार्मिक, सांस्कृतिक महत्वया लिसें द्यःछेँया निर्माणया खँयात कयाः अशोक चैत्य महाविहार संरक्षण समितिया नायः महेन्द्र रत्न शाक्य व आगं छेँ निर्माण समितिया कजि राजेश शाक्यं न्ववानादीगु खः ।