केन्द्रीय मानन्धर संघया ३३क्वःगु व ३४क्वःगु मंकाः दँ मुँज्यां सुवर्ण मान मानन्धरयात सभापति ल्यःगु दु ।

येँया थँहिटी मानन्धर गुथिया नायः ८८ दँया मानन्धरया निदँया कार्यकालया लागिं सर्वसम्मत रुपं सभापति ल्यःगु खः ।

संघय् सभापति बाहेक कार्यसमितिया मेपिं पदाधिकारी व दुजःत प्यदँया लागिं निर्वाचित जुइगु वैधानिक व्यवस्था दु । अथेजुयाः सभापतिया लागिं निर्वाचन थुगुसी हे जूसां संघया मेपिं पदाधिकारीतय् लागिं मेगु अधिवेशनय् जक निर्वाचन जुइ ।

अथेहे, थीथी सांस्कृतिक ज्याखँयात नेतृत्व बीत व नेपाल सरकारया गुठी संस्थान व मेमेगु प्रशासनिक निकायलिसे समन्वय यायेत धालासिक्व मानन्धर सनाः खलकं न्हयसः नायः सदाबहार कार्यसमितिया पदाधिकारी च्वनीगु व्यवस्था दु ।

येँय् क्वचाःगु दँमुँज्याय् बारा जिल्लाया प्रसौनी मानन्धर गुथिपाखें संघय् सभापति जुयाच्वंम्ह मनोज कुमार मानन्धरया कार्यावधि क्वचाःगुलिं न्हूम्ह सभापतिया लागिं निर्वाचन जूगु खः ।

केन्द्रीय मानन्धर संघ २०१० माघ १० गते येँया दैसाः तःबही त्वाःया देवीदास मानन्धरं तत्कालीन येँया मानन्धरतयत कःघानाः गठन यानादीगु खः ।

आः संघय् पूर्वया धराननिसें पश्चिमया स्याङ्जातक थीथी त्वालय् च्वनावःपिं मानन्धरतय् ५८ पुचः आवद्ध दु ।