वाङमय शताब्दि पुरुष सत्यमोहन जोशीया १०५ क्वःगु बुदिं छवाःयंक थीथी ज्याझ्वः यानाः हनीगु जूगु दु ।

वाङमय शताब्दी पुरुष जोशीया बुदिं हनेगु झ्वलय् लोक साहित्य परिषदं छवाःयंक थीथी ज्याझ्वः न्ह्यायेधुंकूगु दु ।

वइगु बैसाख शुक्ल पंचमी अथे धइगु बैसाख ३० मदुम्ह शताब्दी पुरुष जोशीया १०५क्वःगु बुदिं लाःगु दु ।

थ्व हे दिंयात कयाः छवाःयंक थीथी ज्याझ्वःया ग्वसाः ग्वयागु परिषदया नायः राजित बहादुर श्रेष्ठं कनादिल ।

न्हापांगु दिं म्हिगः सोमबाः बैसाख २४ गतेकुन्हु सत्यमोहन जोशी लोक साहित्य भवनय् शताब्दि पुरुष जोशीया सफू ब्वज्या जूगु खः । अथेहे, थौं बैशाख २५ गते मङ्गलबाः परिषदया परिसरय् नामसंगीति पाठ ज्याझ्वः जुल ।

स्वन्हुगु दिं २६ गते बुधबाः सत्यमोहन लोक साहित्य संग्रहालय अवलोकन याकेगु ज्याझ्वः तयातःगु दुसा २७ गते बिहिवार पुलां गुह्यश्वरी द्यःयाथाय् मत च्याकेगु ज्याझ्वः दु ।

ज्याझ्वः कथं २८ गते शुक्रबाः लोक साहित्य वाचनया ग्वसाः दुसाः २९ गते शन्चरबाः सुथय् यलया पूच्वं साइकल र्‍यालि जुइगु जूगु दु ।

व बैसाख ३० गते आइतबाः जोशीया बुदिंया दिनय् परिषदया परिसरय् थीथी सफूया पितब्वज्या जुइगु ज्याझ्वः क्वछिनातःगु दु ।

थुकथं छवाःयंक हे थीथी ज्याझ्वः यानाः शताब्दि पुरुषया बुदिं हनेगु ज्या परिषदं थगुनेनिसें न्ह्याकूगु खः ।