हलिं नेवाः दबूया ग्वसालय् नेपालय् दकलय् न्हापां बाखं च्वयादीम्हसाहित्यकार व मिसा न्ह्यलुवाः मोति लक्ष्मी उपासिकाया ११५ क्वःगु बुदिं हंगु दु ।

वि.सं. २०८१ आइतबाः जूमय् ज्याझ्वः यासें दबुलिं साहित्यकार मोतिलक्ष्मीया बुदिं हंगु खः ।

ज्याझ्वलय् लोककवि राजभाइ जकःमिं स्वीखुदँ न्ह्यः मोतिलक्ष्मीया चयदँ बुन्हि प्रतिभा साहित्यिक परिवारपाखें जनस्तरं तःजिक हनागु खँ लुमंकुसें चिनाखँ ब्वनाः न्यंकादीगु खः ।

अथेहे, पाटन क्याम्पस, नेपालभाषा विभागया प्रमुख उप प्रा. निर्मला श्रेष्ठ, भाषा आयोगया दुजः सुरेश किरण मानन्धर, नेपालभाषा मिसा खलःया पुलांम्ह नायः मंगला कारंजित लिसेंनं मोतिलक्ष्मी उपासिकाया साहित्य, भाषा उत्थानया नितिं योगदानया चर्चा यानादिल ।

विश्वया थीथी देय्या नेवाः व्यक्तित्वतयसं ब्वति काःगु ज्याझ्वलय् मोतिलक्ष्मी उपासिकाया थीथी पक्ष दुथ्याःगु किपा नं ब्वःगु खः ।

दबूया केन्द्रीय नायः संयुक्त श्रेष्ठ व दबुलिं न्ह्याकावःगु डुब्लुडिबि ज्याझ्वःया कजि डा. नरेश शाक्यं भाषा व समाजया नितिं योगदान बियावंपिं व बियाच्वंपिन्त समाजं न्ह्याबलें लुमंकातयेमाःगु खँय् बः बियादीगु खः ।