जर्मनीइ “नेवाः तजिलजि नखः” ज्याझ्वः जुल
eBukhan – समाचार श्राेतः रामगाेपाल तमखु, २०८१ श्रावण ८, मंगलबार वर्गीकृत समाज
जर्मनीइ च्वनावःपिं नेवाः समुदायं जर्मनीइ “नेवाः तजिलजि नखः” ज्याझ्वःया ग्वसाः ग्वःगु दु ।
वंगु आईतबाः पासा पुचः जर्मनीं फ्य्राङ्कफर्ट शहरय् उक्त ज्याझ्वःया ग्वसाः ग्वःगु खः ।
ब्यवसायी लिसें समाजसेवी ज्याझ्वः कजि शंकर महर्जनं मौलिक नेवाः कला तजिलजि, भाषा, पुँसाया संरक्षण यासें भावी पुस्तायात लःल्हानावनेगु आज्जुं ज्याझ्वःया ग्वसाः ग्वयागु धयादिल ।
ज्याझ्वलय् नेवाः नसा सम्हयबजिलिसें लाखेय् प्याखं, लाईभ म्युजिकलिसें थीथी हुलाप्याखं न्ह्यब्वःगु खः ।
ज्याझ्वःया मू आकर्षण कथं ख्वपय् सापारुबलय् पिकाइगु ‘घिङताङकिसि ट्वाक” प्याखं न्ह्यब्वयागु ज्याझ्वः कजि महर्जनं जानकारी बियादिल ।
ज्याझ्वलय् जर्मनीइ दुगु थीथी संघसस्थाया प्रतिनिधि, व्यवसायी, विद्यार्थी व युरोपय् दुपिं गैर नेवाःलिसें युरोपियनत यानाः थ्यंमथ्यं प्यसःम्हेसिया ब्वति दुगु महर्जनं धयादिल ।
ज्याझ्वलय् हलिं नेवाः दबू (wno) या केन्द्रीय न्वकू रजनी प्रधान, सल्लाहकार रविन्द्रमान श्रेष्ठ, दिनेश प्रधान, wno या युरोप कजि लिसें नेवाः खलः हम्वर्ग जर्मनीया संस्थापक कुमार नापित, नेवाः खलः हम्वर्ग जर्मनीया संस्थापक नायः मानव कुमार श्रेष्ठ व नेपालय् अपाङ्गता क्षेत्रय् वंगु प्यंगू दशक न्ह्यःनिसें ज्या यानावःम्ह रमेश श्रेष्ठलिसेंया ब्वति दुगु खः ।
