देशय् राजतन्त्र मदयाः गणतन्त्र वःगु नं निगू दशक थ्यनीन । देशय् आः राजतन्त्र वा जुजु मदु ।

तर यलय् छगू थज्याःगु जात्रा दु, गन थौंतक नं जात्रा स्वःवयेत मल्ल जुजुयात सःतेगु यानाच्वंगु दनि । यलया मल्ल जुजुयात जात्राय् सःतेगु परम्परा यलय् थौंतक नं न्ह्यानाच्वंगु दनि ।

खँ खः, यलया नृसिंह जात्रा (उपाकलं सायाः) यागु । यलया द्यःब्रह्मू राजोपाध्यायतय् उपाकर्म गुठीं हरेक वर्ष भाद्र कृष्ण पंचमीया दिनय् न्ह्याकीगु नृसिंह जात्राय् मल्ल जुजुयात नं जात्रा स्वःवा धकाः सःतेगु यानाच्वंगु दनि ।

यलया षटकुल अर्थात खुगू कुलया राजोपाध्याय द्यःब्रह्मतय् उपाकर्म गुठीं गुठीया दुजःतय् उमेयरया ल्याखं थकालिया आधारय् पाः बियाः दँयदसं जात्रा न्ह्याकेगु याइ ।

राजोपाध्याय द्यःब्रह्मूतय् दकले तःधंगु कर्म धयातःगु उपाकर्मयात पूवंकीगु परम्पराया रुपं कयातःगु थुगु जात्राया नापं गुंपुन्हिकुन्हु श्रावणी कर्मय् नं ब्वति काःवयेत यलया मल्ल जुजुयात गुरु पुन्हिकुन्हु ब्वंवनेगु याइ ।

थ्व झ्वलय् जात्राय् स्वःवयेत जुजुयात सःतःवनेगु परम्परा थुगुसीया नितिं थौं यल दरवारया सुन्दरी चुकय् क्वचाःगु दु ।

थुगुसीया जात्रा पाःलाःम्ह मदुम्ह नृपेन्द्र राज शर्माया तःधिकःम्ह काय् त्रिलोचन शर्मां मल्ल जुजुयात जात्राय् सःतेगु परम्परा ‘स्वां तःवनेगु’ यात निरन्तरता बियादिल ।

जुजुयात सःतेगु कथं स्वांलिसें ग्वय्, जनै, धेबा व सिसाबुसा सुन्दरीचुकय् दुगु ल्वहँया खाताय् तयेगु याइ ।

मल्ल जुजुया प्रतिनिधि कथं गुठी संस्थान यलया प्रमुख वैकुण्ठ आचार्य, पाटन म्यूजियमया प्रमुख सुरेश लाखेलिसें अन उपस्थित जुयाः मल्ल जुजुयात निमन्त्रणा फयाकयादीगु खः ।

यलया षटकुल अर्थात खुगू कुलया द्यःब्रम्हूतय् प्रतिनिधिपिं सुन्दरीचुकय् मुनाः स्वस्तिवाचन यासें जात्राय् ब्वनेगु कथं स्वां तःगु खः ।

व झ्वलय् उपाकर्म गुठी व्यवस्थापन समिति, नृसिंह जात्रा व्यवस्थापन समितिया पदाधिकारी, दुजः, गुठी संस्थान यलया कर्मचारीतय् नं उपस्थिती दुगु खः ।

थौं हे नृसिंह जात्रा स्वःवयेगु नितिं राष्ट्रपति रामचन्द्र पौडेलयात ब्वंगु दु ।

पाःलाःम्हेसियापाखें त्रिलोचन शर्मा राजोपाध्याय, उपाकर्म गुठी व्यवस्थापन समिति, नृसिंह जात्रा व्यवस्थापन समितिया पदाधिकारी, दुजःत शितल निवास वनाः राष्ट्रपति पौडेलयात ब्वना कथं स्वां ब्यूगु खः ।

छु खः नृसिंह जात्राः

यलया षटकुल राजोपाध्याय द्यःब्रह्मूतय् उपाकर्म गुठीं दँय्दसं भाद्र कृष्ण पंचमीया दिनय् नृसिंह जात्रा उपाकलं सायाः न्ह्याकावःगु दु ।

न्हापा न्हापा श्रीधर नारायणया जात्रा न्ह्याकावःगु व छगू इलय् जात्राय् हताः जुइधुंकाः श्रीधर नारायणया जात्रा दिकाः नृसिंह जात्रा न्ह्याकूगु इतिहास दु ।

गुठीया दुजःतय् दथुइ उमेरया ल्याखं थकालिम्हेसिनं जात्राया पाः कयाः न्ह्याकेगु याइ ।

जात्राया पाः लाःम्हेसिया जिलाजं अथवा भिंचा अथवा पुरोहितयात नृसिंह दयेकाः यलया सायाः रुटय् चाःहिकेगु याइ ।

जात्राया पाःलाःम्हेसिनं गुरुपुन्हिकुन्हु मल्ल जुजुयात जात्रा व गुंपुन्हिकुन्हुया श्रावणी कर्मयात सःतःवनेगुलिसें भाद्र कृष्ण पंचमीया दिनय् जात्रा न्ह्याकाः क्वचायेकेमाः ।

थुगु जात्राया नृसिंहयात हिरण्यकश्यपुयात स्यायेत वःम्ह उग्र रुपयाम्ह मखसें हिरण्यकश्यपुयात स्यानाःलि शान्त जुइधुंकूम्ह नृसिंहया रुपं काइ ।

जात्राया झ्वलय् नृसिंहया जवंखवं लक्ष्मी व सरस्वती दइसा न्ह्यःने नृसिंहयात हे स्वस्वं ल्हातय् धुपाँय् ज्वनाः अःखतं प्रह्लाद न्यासिवनाच्वंगु दइ ।

वयां नं न्ह्यःने निम्ह निम्हेसिया अप्सरातय् खुज्वः तुफि, साया दुरु, दण्ड, पंखा, च्वाम्वः आदि ज्वनाः न्यासिवनाच्वनी ।

लिसें नृसिंहया ल्यूने कापःया निम्ह कतांमरि नं चिनातःगु दइ । थुपिं कतांमरितयत हिरण्यकश्यपु व हिरण्याक्ष्य नं धायेगु याःसा मधुकैटभ नं धायेगु याः ।

थुपिं कतांमरित चिचीधिकःपिं मचातयत भागियाकेब्यूसा मचात अरि मचाइगु धार्मिक विश्वास दु ।

थःगु परिवारय् दछिया दुने मदयावंपिनिगु नामय् नृसिंहयात पूजा याःसा मदुम्हेसिया आत्मा वैकुण्ठय् वास जुइगु विश्वास नं याः ।

विश्व शान्तिया कामना यासें न्यायेकीगु थुगु जात्रा सुथांलाक क्वचाःसा प्राकृतिक विपत्तीं दुःख मजुइगु विश्वास नं याइ ।

थुगुसीया जात्रा वइगु भाद्र ८ गते शनिबाःकुन्हु जुइत्यंगु दु ।