नेपालभाषाया संकिपा ख्यलय् नांजाःम्ह कलाकार राजु महर्जन जुजुयात मातृशोकं कःगु दु । कलाकार महर्जनया मां माया महर्जन ८९ दँया उमेरय् मन्त ।

वंगु होलि पुन्हि आइतबाःया दिनय् सुथसिया १०ः४५ ताः इलय् वयकः आकाझाकां मदुगु खः ।

छुं हे स्वास्थ्य समस्या मदुम्ह महर्जनयात वा वयाः ख्वाउँगुलिं वंगु शनिबाःनिसें ज्वर वयाः निमोनियां ज्वंगु खः । ज्वर वःगुलिसें तःक्वःमछि बान्ता नं जुइधुंकाः वयकः तसकं म्हं मफयावंगु खः ।

छेँय् हे डाक्टर क्यनेधुंकाः नं उसाँय् झन स्यनावनेधुंकाः वासः यायेत वयकःयात पाटन अस्पताल यंकूगु खः ।

भेन्टिलेटरय् तयेमाःगु अवस्थाय् पाटन अस्पतालय् भेन्टिलेटर मदयवं वयकःयात नेशनल अस्पताल यंकूगु खः ।

नेशनल अस्पतालय् भेन्टिलेटरय् तयेगु तयारी जुयाच्वँच्वं छक्वलं हे वयकःया नुगः बन्द जूगु खः ।

मदुम्ह महर्जनया अन्त्येष्टि वंगु आइतबाः हे यलया बालकुमारीइ क्वचायेधुंकल । मदुम्ह महर्जनयात वयकःया चीधिकःम्ह काय् राजु महर्जनं मि तयादिल ।

मदुम्ह महर्जनया जन्म वि.सं. १९९१ सालय् जूगु खः ।

मदुम्ह महर्जनया निम्ह काय् व निम्ह म्ह्याय् दी । मदुम्ह महर्जनया स्वम्ह काय् दुगुलिइ तःधिकःम्ह केशव महर्जन नं मदयधुंकल ।