ताः ई संगीत ख्यलय् दिपाः काःम्ह नांजाःम्ह म्येहालामि संजीप प्रधान न्हूगु म्येलिसें हाकनं लिहांवःगु दु ।

‘मोहनि वल, स्वन्ति वल’, ‘पुन्हिया जः थें’, ‘सुथय् न्हापां न्ह्याबलें’, ‘वा वःगु स्वरे’ लिसें यक्व ल्वकं ह्वाःगु म्येत हालादीम्ह म्येहालामि सन्जीप प्रधानया न्हूगु म्ये सार्वजनिक जूगु दु ।

म्येहालामि प्रधानं ‘स्टिम इन्जिन’ बोलयागु म्येया म्यूजिक भिडियो सार्वजनिक यानादीगु दु । ताः ईया दिपा धुंकाः म्येहालामि प्रधानया न्हूगु म्ये सार्वजनिक जूगु खः ।

थौंकन्हय् अमेरिका च्वनाच्वंम्ह प्रधानं छुं दिं न्ह्यः नेपाल वःगु इलय् हे थ्व म्येया सुटिङ क्वचायेकादीगु खः । आः भिज्युअल एडिटिङ सिधयेकाः जुन १७य् थःगु हे युट्युब च्यानलमार्फत थुगु म्यूजिक भिडियो सार्वजनिक यानादीगु खः ।

म्यूजिक भिडियोलय् मोडल करिश्मा श्रेष्ठलिसें म्येहालामि प्रधान थम्हं नं अभिनय यानादीगु दु । सार्वजनिक थुगु म्ये च्वयेगु व लय् चिनेगु ज्या नं म्येहालामि प्रधानं हे यानादीगु दु ।

तःदँया दिपा धुंकाः स्वकुमि, न्यनामिपिनि दथुइ हयागु ‘स्टिम इन्जिन’ म्येयात कयाः थः तसकं आशावादी दुगु प्रधानं धयादिल ।

‘थीथी हुनिं न्हूगु म्ये हयेमफयाच्वंगु खः, आः थ्व म्ये स्टिम इन्जिन हयागु दु । सकसिनं न्हापा थें माया मतिना बियादी धइगु आशा दु’ म्येहालामि प्रधानं धयादिल ।

म्येया सुटिङ काभ्रे जिल्लाया पलाँतिया न्ह्यइपूगु लुइ यानातःगु दु ।

म्यूजिक भिडियोलय् लँय् जुयाच्वंम्ह छम्ह यात्रीया कल्पनाय् वयाच्वंम्ह मिसा वास्तविक जीवनय् नापलाःगु बाखं न्ह्यब्वयातःगु दु ।

लिसें यात्रीया कल्पनाय् वयाच्वनीम्ह मिसाया थीथी रुपमार्फत नेपालया थीथी जातीय पुचःया पुँसा, प्याखंलिसेंया संस्कृति नं क्यनातःगु दु ।

भिडियोया छायांकन उत्सव दाहालं याःगु दुसा दृश्य सम्पादन विकास दाहालं याःगु खः । म्युजिक भिडियोया निर्देशन सुब्रत आचार्यं यानादीगु दु ।