येँ देयया शाक्यतय् झिगू बहाःयात कःघानां नीस्वनातःगु शाक्य महाविहार संघपाखें शाक्य संघदान बरे भ्वय् न्यायेकूगु दु ।

थीथी बहाः बहिया शाक्यतयगु जक उपस्थितिइ न्ह्याकीगु थुगु बरे संघ भ्वजय् श्री दीपंकर तथागत समक्ष पूजा यानां उपस्थितपिन्त संघदान नं याःगु खः ।

संघया अध्यक्ष शुभकाजी शाक्यं नेवाःत संगठित जुया च्वनेमाःगु व थःगु संस्कृति परम्परा यात म्वाका तयेमाःगु खँय् जोड बियादिल ।

शाक्य कुलया परम्पराकथं परापूर्वकालनिसें न्ह्यानावःगु थुकथंया बरे भ्वय् तःदँ न्ह्यःनिसें दिनाच्वंगु खः ।

बरे सर्वसंघ भ्वययात निरन्तरता बीत शाक्य महाविहार संघं साँस्कृतिक पर्वकथं बरे सर्वसंघ भ्वय् न्यायेकाःगु संघया महासचिव संघरत्न शाक्यं कनादिल ।

शाक्य महाविहार संघय् श्रीघः बहाः, नघः बहाः नघः, तःधं बहाः, वटु, महाबुद्ध बहाः महाबौद्ध, स्वःबहाः, यंगाः, असंबहाः, असंगल्लि, बिकमाः बहाः ओम बहाः, यता बहाः ग्वःफः लगं, क्वहिति बहाः क्वहिति व क्वंसाः बहाः ह्यूमत दुथ्यानाच्वंगु दु ।