वरिष्ठ साहित्यकार परशु मन्त
eBukhan – ईबुखँ रिपाेर्टर, २०८० चैत्र ६, मंगलबार वर्गीकृत मनोरञ्जन
वरिष्ठ साहित्यकार परशु प्रधान मन्त । पी.आर. प्रधान नामं नं म्हस्यूम्ह वरिष्ठ साहित्यकार प्रधान म्हिगः चान्हय् न्हू बानेश्वरस्थित थःगु हे छेँय् मदूगु खः ।
मदुम्ह प्रधानया काय् प्रतिक प्रधानं वयकःया सीम्हयात थौं सुथय् ९ बजे तक्क बानेश्वरस्थित राधामोहन मार्ग– २० य् श्रद्धाञ्जलीया नितिं तयेगु धयादिल ।
छगू फेसबुक पोस्टमार्फत मदुम्ह प्रधानया काय् प्रतिकं वय्कःया अन्त्येष्टि थौं सुथय् ९ः३० बजे पशुपति आर्यघाटय् जुइगु जानकारी नं बियादिल ।
८० दँ दुम्ह प्रधान वि.सं. २००० साल माघ ३० गते भोजपुरय् बूगु खः ।
वि.सं. २०१४ सालय् भोजपुरया विद्योदय हाइस्कूलं एसएलसी उत्तीर्ण याःम्ह वय्कलं नेपाली व राजनीतिशास्त्रय् स्नातकोत्तर तहतक अध्ययन यानादीगु दु ।
वय्कःया काय् प्रतिक डिजिटल मिडिया सोसाईटीया नायः, बार्हखरी मिडियाया कार्यकारी नायः लिसें बार्हखरी अनलाइनया प्रधान सम्पादक नं खः ।
मदुम्ह प्रधानया छेँजलय् वय्कःया जहान कल्पना प्रधानलिसें निम्ह काय् व निम्ह म्ह्याय् दी ।
विशेष यानाः बाखं व उपन्यास विधाय् च्वसा न्ह्याकाच्वंम्ह वय्कःया १३गू बाखं मुना पिदंगु दु ।
वि.स. २०१६ सालय् विराटनगरं प्रकाशित जुइगु छहारीइ वय्कःया न्हापांगु रचना ‘हाँसेका ती चन्द्रमा’ प्रकाशित जूगु खः ।
वय्कःया ‘बक्ररेखा’, ‘फेरि आक्रमण’, ‘यौटा अर्को दन्त्यकथा’, ‘असम्बद्ध’, ‘समुद्रमा अस्ताउने सूर्य’, ‘यौटा क्रान्तिपुरुषको जन्म’, ‘द लिटिल बुद्ध इन टोकियो’ लिसेंया बाखंमुना पिदंगु दु ।
प्रधानयात नेपाल साहित्य संस्थान पुरस्कार, रत्नश्री स्वर्ण पदक २०३१ लिसें थीथी सिरपा व सम्मानं सम्मानित याःगु दु ।
