म्येहालामि प्रतिमा बज्राचार्यं हालादीगु म्ये ‘दः यःम्ह व गन दइ’ या म्यूजिक भिडियो सार्वजनिक जूगु दु । थौं येँय् छगू ज्याझ्वः यासें म्यूजिक भिडियो सार्वजनिक याःगु खः ।

म्यूजिक भिडियोया कलाकार, प्राविधिकलिसें नेपालभाषा कला ख्यलय् नांजाःपिं कलाकारपिनिगु दथुइ म्यूजिक भिडियो सार्वजनिक याःगु खः ।

ज्याझ्वलय् न्ववासें वरिष्ठ निर्देशकद्वय रामकृष्ण खड्गी, सुरेन्द्र तुलाधरं नेवाः संकिपा व म्यूजिक भिडियो ख्यः संख्यात्मक ल्याखं तःमि जुजुं वनाच्वंगु व नेवाः समाजपाखें थुकियात तिबः बियावनेमाःगुलिइ बः ब्यूगु खः ।

पत्रकारपिं दर्शनबीर शाक्य, बिराजकाजी राजोपाध्याय, सुरजबीर बज्राचार्यलिसें नं नेवाः म्यूजिक भिडियो ख्यलय् छगू बांलाःगु म्ये वःगु धासें म्ये व म्यूजिक भिडियो टिमयात भिंतुना ब्यूगु खः ।

गायकद्वय भीम तुलाधर, संजीप प्रधानं थःगु कला यात्रा न्ह्याकातयेत गायिकालिसें सकल टीमयात भिंतुना बियादिल ।

सार्वजनिक जूगु म्ये च्वयेगु लिसें लय् तयेगु ज्या बिकास रत्न कंसाकारं यानादीगु दु ।

म्यूजिक भिडियोया दृश्य सम्पादन लुःजः इन्टरटेनमेन्टपाखें याःगु दुसा छायाङ्कन लुःजः सिंहं यानादीगु दु । निर्देशन राजन शाहीं यानादीगु दु ।

भिडियोलय् प्रविधि कमल कंसाकार, प्रतिज्ञा बज्राचार्य, संजय मालीलिसें सरस्वती मानन्धर व नरेन्द्र कंसाकारं अभिनय यानादीगु दु ।

म्येया भिडियोलय् परम्परागत नेवाः बस्ती व रहनसहन क्यनेत स्वयातःगु दु ।

लुःजः इन्टरटेनमेन्टया यूट्युब च्यानलं म्यूजिक भिडियाे सार्वजनिक जूगु दु ।