वागमती प्रदेश नां हिलाः नेपाः मण्डल तयेमाःगु माग यासें येँय् जूगु प्रदर्शनय् झडप जूगु दु ।

राष्ट्रिय मुक्ति क्रान्ति अभियान अन्तर्गतया स्वनिगः (उपत्यका) विशेष ब्यूरो नेवाः राष्ट्रिय परिषदं याःगु प्रदर्शनय् प्रहरीं हस्तक्षेप याःबलय् झडप जूगु खः । झडपया झ्वलय् ३०म्ह प्रदर्शनकारी घाःपाः जूगु परिषदं जानकारी ब्यूगु दु ।

‘बहुलराष्ट्रिय राज्य स्थापना या, बागमति प्रदेश नां खारेज या, नेपाः मण्डल कायम या’ लिसेंया नारा थ्वयेकाः न्ह्याःवनाच्वंगु प्रदर्शन भद्रकाली थ्यंबलय् निषेधित क्षेत्र त्वाःथःगु धासें प्रहरीं पंगु खः ।

प्रहरीं र्‍याली निषेधित क्षेत्र सिंहदरवारपाखे वनेत स्वःबलय् पनागु धयाच्वंबलय् परिषदया कजि सुमन सायमिं धाःसा थःपिं भद्रकाली चाःहिलाः न्ह्यःने वयेत स्वयाबलय् प्रहरीं छक्वलं लाठी चार्ज याःगु दावी यानादिल ।

‘द्यःयात जवं चाःहिलेगु झीगु चलन खः । जिमिसं भद्रकाली चाःहिलाः न्ह्यःने वयाः कोणसभा यायेत स्वयागु खः तर, प्रहरीं छक्वलं जिमित दमन यानाः निर्मम तरीकां लाठीचार्ज यात व जिमि पासापिन्त घाःपाः यानाबिल’ कजि सायमिया धापू खः ।

प्रहरीं प्रदर्शनकारीतयत निर्ममतापुर्वक दमन याःगु व मिसातयत तकं ल्हाः तःगु परिषदया विद्या श्रेष्ठं धयादिल ।

‘जिमिसं सुयां भाग लाकाकाःवनागु ला मखु, सकसिगु अपनत्व जुइकथं बहुलराष्ट्रिय राज्य स्थापनाया माग यानागु खः । ईतिहास व संस्कृतिलिसे स्वाःगु नां प्रदेशयात बीत माग यानागु खः तर, राज्यं जिमित महिताःया व्यवहार यात’ श्रेष्ठं धयादिल ।

झडपया झ्वलय् प्रहरीपाखे प्रहरी जवान रामसिंह बोहरा नं घाःपाः जूगु व वयकःयात अन्नपूर्ण न्यूरो अस्पतालय् वासः यानाच्वंगु प्रहरीं धाःगु दु ।

थ्वयां न्ह्यः परिषदया आह्वानय् येँया दरवार क्षेत्र बसन्तपुरं ‘बृहत जनप्रदर्शन ज्याझ्वः’ न्ह्याःगु खः ।

वसन्तपुरं र्‍याली न्ह्याकाः येँया थीथी थासं जुयाः तिंख्यलं भद्रकाली थ्यंगु खः ।

भद्रकालीइ थ्यंकाः कोण सभा यायेगु ज्याझ्वः दुगुलिइ प्रहरीं हस्तक्षेप यायेधुंकाः कोणसभा धाःसा जुइमफुत ।

र्‍यालिइ थीथी समुदायपाखें द्वलंद्वःया ल्याखय् ब्वति दुगु खः ।

जनप्रदर्शनय् नेवाः समुदायया सामाजिक अभियन्तालिसें मधेसी, तामाङ, च्योबाङ, गुरूङ, राई, बाहुन, क्षेत्री, थारू, लिम्बू, शेर्पा, कुसुन्डालिसें नेपालया दक्वं जातजातिया ब्वति दुगु परिषदं दावी याःगु दु ।

राज्यं नेवाःलिसें आदिवासी जनजातिया पहिचान, संस्कृति न्हंकाछ्वयेगु कुतः निरन्तर जुयावःगु अवस्थाय् थनया मूर्त, अमूर्त संस्कृति, सम्पदा ल्यंकेत थ्व आन्दोलन निरन्तर न्ह्यानाच्वनीगु परिषदं न्ह्यथंगु दु ।

नेवाःलिसें नेपालया राज्यविहिन राष्ट्रयात कायम औपनिवेशिकता न्हंकाः नेपाः मण्डललिसें बहुलराष्ट्रिय राज्य नेपाल स्थापना यायेमाःगु माग नेवाः राष्ट्रिय परिषदं तयावःगु दु ।