बागमति प्रदेश सरकारया संस्कृति, पर्यटन व सहकारी मन्त्री पुकार महर्जनं स्थानीय संस्कृति, सम्पदायागु संरक्षण, सम्वर्ध्दन व प्रवर्ध्दनय् थः दत्तचित्त जुयाः न्ह्यज्यायेगु धयादीगु दु ।

आइतबाः यलया गाःबहालय् रत्नाकर महाविहारया अवलोकन भ्रमणय् थ्यंम्ह मन्त्री महर्जनं थः थ्व हे संस्कृति, सम्पदाय् हे म्हिता ब्वलंम्ह जूगुलिं थुकी दुनुगलंनिसें मतिना दुगु धयादिल ।

‘स्थानीय संस्कृति, सम्पदाया महत्व जिं बांलाक्क स्यू । थुकिया संरक्षणया दायित्व राज्यया खः धकाः नं जिं थू । थुकिया नितिं जि बागमति प्रदेश सरकारनाप माःगु समन्वय याना न्ह्यज्याये’ मन्त्री महर्जनं धयादिल ।

व इलय् महर्जनं यलया लायकू कुमारीया नं दर्शन यानादीगु खः । नापं वय्‌कलं रत्नाकर बचत तथा ऋण सहकारी संस्था लिमिटेडया नं निरिक्षण यानादिल ।

रत्नाकर महाविहार र सहकारीयागु निमन्त्रणाय् मन्त्री महर्जन अवलोकन भ्रमणया नितिं अन थ्यंगु खः ।

रत्नाकर सहकारीया नायः करुणारत्न बज्राचार्यं यल कुमारीयागु संरक्षणया दायित्व राज्यं काय्ेमाःगु माग थःपिन्सं मन्त्री महर्जनया न्ह्यःने तयागु जानकारी बियादिल ।

‘यल कुमारीया नितिं यल महानगरपालिकापाखें चीधंगु ग्वहालि स्वयां अप्वः राज्य पक्षपाखें छुं नं मदु । कुमारीया नितिं माःगु व्यवस्था राज्यपाखें जुइमाल, कुमारीया दायित्व राज्यं कायेमाल धइगु माग जिमिसं मन्त्रीजुयात तया’ नायः बज्राचार्यं धयादिल ।

थःपिनिगु मागप्रति मन्त्री महर्जनं सकारात्मक प्रतिक्रिया बियादीगु नं बज्राचार्यं जानकारी बियादिल ।

व इलय् अन बागमति प्रदेश सांसद शैलेन्द्र बज्राचार्यया नं उपस्थिती दुगु खः । थम्हं न्हापा नं स्थानीय संस्कृति, सम्पदाया संरक्षणया नितिं ज्या यानाच्वनागु धासें सांसद बज्राचार्यं आः जन प्रतिनिधिया रुपय् थुकिया नितिं अझं सशक्त व नतिजामुखी ढङ्गं न्ह्यःने वनेगु धयादिल ।

रत्नाकर महाविहार व सरकारीया भ्रमण धुंकाः मन्त्री महर्जनं उज्वतदेब महाविहार, वनबहाःया नं अवलोकन यानादीगु खः ।