मध्यपुर थिमिया नवरत्न लाइफ स्कूलं थिमिइ मध्यपुर मन्दः धेंधें बल्लाः कासा याइगु जूगु दु ।

मध्यपुर थिमि नगरपालिका वडा ४ स्थित नवरत्न लाइफ स्कूलं कन्हय् (सोमबाः) मध्यपुर थिमि व्यापी मन्दः धेंधें बल्लाः कासा यायेत्यंगु खः ।

नवरत्न स्कूलका प्रिन्सिपल सुरेन्द्र तुंबंजाः श्रेष्ठं रंगोलीया नामय् न्हू पुस्ताय् तना वनाच्वंगु मन्दःया संस्कृति पुस्तान्तरणया आज्जुं कासा यायेत्यनागु धयादिल ।

‘मन्दः धयागु रंगोली थें थः यत्थे छु छु यः, व व दयेकेगु मखु, मन्दःलिसे स्वानाच्वंगु सांस्कृतिक, सामाजिक अझ धाये तन्त्रलिसे स्वानाच्वंगु धार्मिक महत्व तकं न्हू पुस्तां सीका कायेमा धकाः कासा यायेत्यनागु खः’ प्रिन्सिपल तुंबंजाः श्रेष्ठं धयादिल ।

भक्तपुर अफ चेम्बर अफ कमर्सया नायः तकं खःम्ह प्रिन्सिपल श्रेष्ठं मन्दःयात मात्र कलात्मक चित्रया रुपं मकाःसे वास्तविक मन्दः त्वाःत्वालय् खनेदयेमा धकाः कासाया ग्वसाः ग्वयागु धयादिल ।

‘न्हापा न्हापा जूसा स्वन्ति वयाकथं ध्वाखा दयेकेगु धेंधें बल्लाः, मन्दः धेंधें बल्लाः जुइगु, व थौंकन्हय् खनेमन्त । थुकथंया कासाया माध्यमं झीगु तजिलजिया अर्थ न्हू पुस्तां थुइकेमा, पुस्तान्तरण जुइमा धइगु आज्जु खः’ श्रेष्ठया धापू खः ।

मध्यपुर थिमि नगरपालिकाय् मुक्कं गुंगू वडा दु । थुगु गुंगुलिं वडां हरेक दँ पुचः, जातीय समुदाय, वर्गं कासाय् ब्वति कायेफइगु जानकारी श्रेष्ठं बियादिल ।

थुगु मन्दः कासां सकलसित धेंधें बल्लाः, त्याःबू स्वयां नं स्यनाबीगु, सयेकेगु ह्वःताः बीगु श्रेष्ठं धयादिल ।

कासाय् त्याकामिं नेवाः पहः खनेदइगु शील्डलिसें तका सिरपाः त्याकेफइगु ग्वसाः खलकं धाःगु दु ।

तका सिरपालय् न्हाप लाइम्हेसित २५द्वः तका बीगु जूगु दुसा ल्यू लाइम्हं २०द्वः व लियांल्यू लाइम्हं २०द्वः तका सिरपाः त्याकी ।

अथेहे, प्यंगूगु व न्यागूगु थासय् लाइपिन्त २५सः तका बीगु जूगु दु ।