वागमती प्रदेशया मुख्यमन्त्री किरण कुमार थापा मगरं नेपालभाषा व नेवाः समुदायया कला, तजिलजि देयया म्हसीका जूगु बिचाः तसें थुकिया संरक्षणया लागिं प्रदेश सरकारं माःगु पलाः ल्ह्वनेगु प्रतिवध्दता प्वंकादीगु दु ।

नेपालभाषा एकेडेमिं मंगलबाः किपुलिइ ग्वसाः ग्वःगु दान्यहिरा सिरपाः ११४६ देछा ज्याझ्वलय् मन्त्री थापा मगरं एकेडेमिं नेपालभाषा वा नेवाः साहित्य, तजिलजिया अध्ययन अनुसन्धान व अभिलेखीकरणलिसेंया ख्यलय् यानावःगु ज्यायात च्वछासें आवश्यकता कथं सहकार्य यायेत प्रदेश सरकार तयार दुगु धयादिल ।

‘म्हिगःया दिनय् नेवाःतय् राज्य जुयाच्वंगु स्वनिगलय् थनया भाषा, कला, साहित्यया संरक्षण सम्वर्ध्दन यायेत नेपालभाषा एकेडेमिया योगदान च्वछायेबहःजू । प्रदेश सरकारं यायेमाःगु ज्याय् समन्वय व सहकार्य यानाः आवश्यकताया लिधंसाय् बजेट तकं विनियोजन यानां न्ह्याःवनेगु प्रतिवध्दता प्वंकाच्वना ।’ मुख्यमन्त्री मगरं धयादिल ।

ज्याझ्वलय् एकेडेमिया चान्सलर मल्ल के. सुन्दरं एकेडेमीया स्थापनाकालनिसेंया संघर्षया बारे जः ह्वनेगुया नापं भावी योजना नं कनादिल ।

ज्याझ्वलय् साहित्य, संगीत व विज्ञान प्रविधि ख्यलय् विशिष्ट योगदान ब्यूगु धासें स्वम्हेसित दान्यहिरा सिरपाः लःल्हाःगु खः ।

साहित्यपाखे समालोचक पूर्णकाजी ताम्राकारयात सिरपालं हंगु खः । संगीत ख्यःपाखे नांजाःम्ह म्येहालामि प्रवेशमान शाक्ययात सिरपाः बिलसा विज्ञान प्रविधिपाखे एलेन बैलोचन तुलाधर सम्मानित जुल ।

सम्मानित स्वम्हेसितं एकेडेमिया चान्सलर मल्लं दोसल्ला न्ययेकादिल सा बागमति प्रदेशया मुख्यमन्त्री मगरं हनापौ लःल्हानादिल ।

तका सिरपाः एकेडेमिया संरक्षक यज्ञरत्न धाख्वालं लःल्हानादिल । तका सिरपाःया राशी म्हतिं ५०द्वः/५०द्वः तका दु ।

ज्याझ्वलय् एकेडेमिया भाइस चान्सलर डा. पुष्पराज राजकर्णिकारं सम्मानित व्यक्तित्वपिनिगु म्हसीका न्ह्यब्वयादिल सा दुजः छ्यान्जे महेन्द्रगोपाल कर्माचार्यं एकेडेमिं यानावःगु ज्याझ्वः व गतिविधिबारे कनादिल ।

सम्मानित व्यक्तित्वय् समालोचक ताम्राकार व तुलाधरं थःथःगु नुगःखँ तयादिल सा म्येहालामि शाक्यं थःगु लोकंह्वाःगु म्ये ताः दत मखनागु, छ वल छन्त स्वस्वं व बहार बनी हालाः न्यंकादिल ।

ज्याझ्वलय् वीर प्रसाद भन्सारी, गुज्ये मालाकार, रफेला महर्जन व रिता महर्जनं म्ये हालाः न्यंकादीगु खः ।

एकेडेमि दँयदसं साहित्य, संगीत व विज्ञान प्रविधि ख्यलय् विशिष्ट योगदान ब्यूपिं व्यक्तित्वयात दान्यहिरा सिरपाः लःल्हानावःगु दु ।