Apexcoder  tech

पतक्व त्वालय् नासःद्यःया देगः पुनर्निर्माण क्वचाल

eBukhan – बिराज,    २०८१ भाद्र २९, शनिबार    वर्गीकृत तजिलजि

यल पतक्व त्वालय् नासः चुकय् विराजमान नासःद्यः (नित्यनाथ) या देगः पुनर्निर्माणया ज्या क्वचाःगु दु ।

देगः पुनर्निर्माण जूगु लिसें धार्मिक विधिविधान कथं पूजा, हवन यानाः देगः दुने नित्यनाथया न्हूगु मूर्ति नं स्थापना याःगु दु ।

वंगु बिहिबाः नासःचुकय् हवन यानाः प्राण प्रतिष्ठा यासें नासःद्यःया मूर्ति पुनर्स्थापना याःगु खः । लिसें नित्यनाथया च्वसं हनुभैरव, नित्यनाथलिसें नन्दी, भृङ्गि, देगःया फलय् पंचपाण्डव, सिद्धिलक्ष्मीया प्रतिक कथं मन्दः नं स्थापना याःगु खः ।

तत्कालीन इलय् श्रीनिवास मल्लं मंगलय् भिंद्यःया देगः दयेकेब्यूबलय् भिंद्यःया मूर्तिइ प्राण प्रतिष्ठा थ्व हे नासःचुकय् याःगु खः ।

भिंद्यःया प्राण प्रतिष्ठा थन हे याःगु जूगुलिं थन नित्यनाथलिसें पंचपाण्डव नं तःगु यल तलेजुया पूजारी व नासःचुकया स्थानीय वासिन्दा नीरन ज्वालानन्द राजोपाध्यायं धयादिल ।

‘नासःचुक नामं हे थन नित्यनाथ वा नासःद्यः हे विराजमान दु धइगु सीदु । मंगलय् च्वंम्ह भिंद्यःया प्राण प्रतिष्ठा थन यायेधुंकाः भिंद्यःलिसें पंचपाण्डव नं थन हे स्थापना यानाः पूजा याःगु खनेदु’ राजोपाध्यायं धयादिल ।

देगःया पुनर्निर्माणया ज्या अप्वः यानाः पुलांगु हे सामग्री छ्यलाः याःगु दुसा पूवंक हे क्षति जुइधुंकूगु ब्वया थासय् जक न्हूगु सामग्री छ्यःगु दु ।

थ्व देगः ताः इलंनिसें हे जीर्ण अवस्थाय् लानाच्वंगु खःसा थनया नासःद्यःया मूर्ति नं करीब ४०दँ ति न्ह्यः खुयायंकूगु खः ।

आः देगः पुनर्निर्माण जूगुलिसें नित्यनाथया न्हूगु मूर्ति नं दयेकाः स्थापना याःगु खः ।

पतक्व टोल सुधार समितिया पहलय् निगू लख तकाया लागतय् देगः पुनर्निर्माणया ज्या क्वचाःगु खः ।

देगः पुनर्निर्माणया लागिं यल महानगरपालिका १६ वडा ज्याकूपाखें धेबा उपलब्ध जूगु टोल सुधार समितिया नायः महेश्वर लाल ख्वःसिं जानकारी बियादिल ।

हनुभैरवलिसें दुम्ह नित्यनाथ, नन्दी व भृङ्गिया न्हूगु मूर्तिया लागिं तूगु धेबा २५द्वः तका पतक्व त्वाःया स्थानीय राजोपाध्याय द्यःब्रह्मूपिनिगुपाखें प्राप्त जूगु नं नायः ख्वःसिं कनादिल ।