भद्रकाली प्रदर्शनया झ्वलय् ज्वनायंकूपिन्त तत्काल मत्वःतूसा चौकी घेराउतकया विरोध ज्याझ्वः यायेगु नेवाः राष्ट्रिय परिषदं न्ह्यथंगु दु ।

राष्ट्रिय मुक्ति क्रान्ति अभियान अन्तर्गतया नेवाः राष्ट्रिय परिषदं सोमबाः येँय् पत्रकार सम्मेलन यासें थथे घोषणा याःगु खः ।

ज्याझ्वःया वक्तातयसं शनिबाः जूगु शान्तिपूर्ण सांस्कृतिक र्‍यालीइ राज्यं बरबरता क्यंगु धासें ज्वनायंकूपिन्त तत्काल त्वःतेमाःगु माग याःगु खः ।

ज्याझ्वलय् न्ववासें नेवाः राष्ट्रिय परिषदया कजिसुमन सायमीं राज्यं नागरिकया शान्तिपूर्ण रुपं सांस्कृतिक प्रदर्शन यायेदइगु संवैधानिक अधिकारया हनन जूगु धयादिल ।

शान्तिपूर्ण रुपं जूगु सांस्कृतिक प्रदर्शनय् प्रहरीं मिसा, बौद्ध भिक्षुयात तकं दाःगु, प्यंकूगु व घाःपाः जुयाः अस्पतालय् याकाच्वंपिन्त तकं ज्वनायंकूगु धयादिल ।

‘संघीय लोकतान्त्रिक गणतन्त्रय् थथे जुइगु खःसा थ्व लोकतन्त्रया हे उपहास खः । जिमि खुम्ह पासापिं अझं हिरासत दनि । उमित बुधबाःतकय् निःशर्त मत्वःतूसा चौकी घेराउतकया विरोध ज्याझ्वः यायेगु जुइ’ कजि सायमीं धयादिल ।

वंगु चैत्र २४ गते शनिबाः परिषदं येँया बसन्तपुलिं सांस्कृतिक र्‍याली पिकाःगु खः । उगु र्‍याली बसन्तपुलिं येँया थीथी थासं तिंख्यः जुयाः भद्रकाली थ्यंगु खः ।

भद्रकाली थ्यनेधुंकाः प्रहरीं निषेधित क्षेत्र धासें पनेत स्वःबलय् अन निगू पक्ष दथुइ झडप जूगु खः ।

झडपया झ्वलय् प्रहरीं चिवर फिनातःम्ह भिक्षुयात तकं लाकमं थ्वाःबलय् थुकिया प्यखेरं आलोचना व विरोध जुयाच्वंगु दु । यद्यपि प्रहरीं धाःसा बौद्ध भिक्षुयात दुर्व्यवहार याःम्ह प्रहरीयात विभागीय कारवाही यायेधुनागु धायेधुंकल ।

सोमबाःया पत्रकार सम्मेलनय् न्ववासें अभियानया कजि लिसें पूर्व उपप्रधानमन्त्री राजेन्द्र महतों भिक्षुयात दुर्व्यवहार जूगुलिइ प्रहरी कर्मचारीयात कारवाही यानाः मगाःगु धासें गृहमन्त्रीं माफी फ्वनेमाःगु धयादीगु दु ।

‘शान्तिपुर्ण सांस्कृतिक प्रदर्शनय् वःपिनिगु छ्यं तछ्यानाबीगु, धिमेय्, डम्फु, झ्याम्टालिसेंया सांस्कृतिक बाजं तछ्यानाबीगु, भिक्षुयात लाकमं थ्वायेगु । थ्व दक्वंया जिम्मेवारी गृहमन्त्रीं कयाः माफी फ्वनेमाः । मखुसा गृहमन्त्रीं राजिनामा ब्यूसां ज्यू’ महतोया धापू खः ।

लिसें महतों बहुलराज्य स्थापना व नेपाः मण्डल प्रदेश घोषणा मजूतल्ले थःपिनिगु अभियान मदीगु उद्घोष यानादिल ।

राज्यं हे आदिवासी जनजाति समुदायया पहिचान न्हंकेत स्वयाच्वंगु द्वपं ब्युसें महतों सकसिगु अस्तित्व स्थापित यायेत थःपिन्सं अभियान न्ह्याकागु धयादिल ।

‘माइतीघर मखु, फिब्वख्यः जुइमाल, टुँडिखेल मखु, तिंख्यः जुइमाल व बागमति प्रदेश मखु, नेपाःमण्डल प्रदेश जुइमाल नेवाः समुदायया आदिभुमि । एकनश्लीय सोच व नीति आः स्वीकार याये फइमखु’ कजि महतों धयादिल ।

स्वनिगः विशेष ब्यूरोया कजि रविन्द्र कुमार श्रेष्ठं शान्तिपूर्ण प्रदर्शनय् बौद्ध भिक्षु, रमजानया व्रत च्वनाच्वंपिं मुस्लिम समुदायलिसें, प्रदर्शनय् सहभागी हे मखुपिं भद्रकालीइ दर्शन याःवःपिं तामाङ दर्शनार्थीतयत तकं प्रहरीं लिनाः लिनाः दाःगु द्वपं बियादिल ।

ज्याझ्वःया मेपिं वक्तातयसं सकसिगु अपनत्व दइगु, समानता अले समावेशी प्रतिनिधित्वलिसेंया बहुलराष्ट्रिय राज्य स्थापनाया लागिं पटक पटक भद्रकालीइ मुनेत व पटक पटक छ्यनय् लाठी नयेत तयार दुगु धासें एकलजातीय राज्य अन्त्य जुइमाःगु माग याःगु खः ।

पत्रकार सम्मेलनमार्फत बहुलराष्ट्रिय राज्य स्थापनाया नितिं सकल नेपाःमित छधी जुइत आह्वान याःगु दु ।