विश्वास बज्राचार्यया न्हूगु होलि म्ये पिदनीगु
eBukhan – बिजयरत्न, २०८० चैत्र ८, बिहिबार वर्गीकृत मनोरञ्जन
फागु अर्थात होलि सतिनावःलिसे होलिया न्हून्हूगु म्ये पिदनेगु नं अप्वःगु दु ।
व हे झ्वलय् म्ये च्वमि विश्वास बज्राचार्यया “बसन्तया बेला छिगु मन गन ला ?” बोलया म्येया म्यूजिक भिडियो नं पिदनीगु जूगु दु ।
थुगु म्येया म्यूजिक भिडियोया नितिं छुं दिं न्ह्यः जक ख्वपय् सुटिंग क्वचाःगु दु ।
थुगु म्युजिक भिडियोया निर्देशन नं म्ये च्वमि बज्राचार्यं हे यानादीगु दु ।
थुगु होलि म्येयात नेवाःख्यःया मल्टिस्टारर म्यूजिक भिडियो कथं न्ह्यब्वयेत्यनागु म्ये च्वमि व निर्देशक बज्राचार्यं धयादिल ।
बज्राचार्यया कथं थुगु म्यूजिक भिडियोलय् कलाकार श्यामसुन्दर शिल्पकार व अर्णेश्वरी शिल्पकारया नापनापं रोजिना सुवाल र किरण जोशीया नं मू भुमिका दु ।
अथेहे, सुजना बज्राचार्य, सिताराम माकः, शान्ति राजबाहक, चिरीबाबु महर्जन लगायतया आपालं कलाकारतयसं म्हितातःगु दु ।
म्यूजिक भिडियोया कोरीयोग्राफी उपासना शाक्यं यानादीगु दु ।
म्येया छायाङ्कन व दृश्य सम्पादन आकृष्ट शाक्यं यानादीगु दुसा भिजुअल इफेक्ट बिजन राज बज्राचार्यं यानादीगु खः ।
सुरेन्द्र श्रेष्ठं लसय् हनादीगु म्येयात सुरेन्द्र श्रेष्ठ व दिपा महर्जनं सः बियादीगु दुसा रत्नशोभा महर्जनं नं साथ बियादीगु दु ।