थाइल्यान्डय् न्ह्यानाच्वंगु आइडब्ल्युएफ वर्ल्ड कप २०२४ य् ब्वति कायेत नेपाली भारोत्तोलन टोली वइगु आइतबाः उखेपाखे वनेत्यंगु दु ।

नेपाल भारोत्तोलन संघया दुजः राम सुन्दर श्रेष्ठ सुशनया व्यवस्थापनय् प्रशिक्षक जीवन गौतम व भारोत्तोलन कासामि सागर भण्डारीया टोली उगु कासाया लागिं थाइल्यान्डया फुकेट वनेत्यंगु खः ।

स्वम्ह दुजःया टोलीयात बुधबाः नेपाल ओलम्पिक कमिटीं विदाइ याःगु दु ।

ओलम्पिक कमिटीया सातदोबाटोस्थित मुख्यालयय् जूगु ज्याझ्वलय् कमिटीया नायः लिसें पूर्व मन्त्री जीवनराम श्रेष्ठं सफलताया भिंतुना देछासें विदाइ बियादिल ।

ज्याझ्वलय् ओलम्पिक कमिटीया मू छ्यान्जे निलेन्द्र राज श्रेष्ठ, डा. ज्ञानेन्द्र शाह, नेपाल फेन्शिङ संघया मू छ्यान्जे व कमिटीया कार्यकारी छ्यान्जे सुजनलाल श्रेष्ठ, भारोत्तोलन संघया नायः राम श्रेष्ठ बोसलिसें संघया पदाधिकारीतय् उपस्थिति दुगु खः ।

मार्च ३१ निसें न्ह्याःगु उगु धेंधें बल्लाखय् भण्डारीं पुरुष १०९ केजी च्वयया ग्यसु पुचलय् अप्रील ११य् प्रतिस्पर्धा यायेत्यंगु दु ।

भण्डारीं थ्वयां न्ह्यः एशियाली सिनियर भारोत्तोलन च्याम्पियनसिपय् क्लिन एन्ड जर्कय् १७१ केजीया भारवहन यानाः न्हूगु राष्ट्रिय कीर्तिमान दयेकूगु दु ।