अमेरिकाया न्युयोर्कय् नेपाल सम्वत ११४६ या लसता तःजिक हंगु दु ।

नेवाः गुथि न्युयोर्क व नेवाः नखः न्युयोर्कं वंगु शनिबाः (अक्टोवर २५ २०२५) अमेरिकाया न्युयोर्कस्थित ज्याक्सन हाईटया डाइभर्सिटी प्लाजाय् न्हूदँया भिंतुना र्यालीया ग्वसाः ग्वःगु खः ।

ज्याझ्वलय् नेवाः गुथिया नायः विजय मान सिंं सकसित न्हूदँया भिंतुना देछासें शंखधर साख्वालं व इलय् सकसिगु त्यासा पुलाः सकसित त्यासामुक्त यानां नेपाल सम्वत न्ह्याकूगु जानकारी बियादिल ।

हिमालयन बुद्धिस्ट कम्युनिटीया नायः हृदय तुलाधर, न्युयोर्क सिटी डिस्ट्रिट ३ या काउन्सलर बिरेन्द्र मानन्धरं नेपाल सम्वतया महत्त्वय् जः ह्वलादिल ।

नेपाल सम्वत न्हूदँया समारोह व र्यालीया विकासक्रम बारे डा. मीम लाल नकर्मीं कनादिल । आदिवासी जनजाति महासंघ, अमेरिकाया नायः तोरण गुरुङ्गं नेपाल सम्वत, छुं वर्ग, जात, समुदाय विशेषया जक मखसें मुक्कं नेपाःमिया हे राष्ट्रिय सम्वत खःगु बिचाः तयादिल ।

अथेहे, नेवाः नखः न्युयोर्कया नायः डा. नरेश मान शाक्यं नेपाल सम्वत् न्हूदँयात उत्सवया हनेगु गुकथं न्ह्यात व नेपाल सम्वत आन्दोलनं गज्याःगज्याःगु उपलब्धि चूलात धइगु जानकारी बियादिल ।

ज्याझ्वलय् नेवाः गुथिया दुजः राजेन्द्र महर्जन, नेवाः नखः न्युयोर्कया मूछ्यान्जे तुलसी नारायण चित्रकार व नेवाः गुथि न्युयोर्कया मूछ्यान्जे सुवर्ण शाक्यलिसें नं न्हूदँया भिन्तुनालिसें थःथःगु खँ तयादीगु खः ।

ज्याझ्वलय् उपस्थित सकसितं नेवाः तजिलजि कथं ह्याउँ सिन्हः, क्वखालिसें ख्येँय् सगं नं ब्यूगु खः ।

औपचारिक ज्याझ्वः धुंकाः भिंतुना र्याली पिकाःगु । शंखधर साख्वाःया किपालिसेंया ब्यानर, थीथी प्लेकार्डलिसें पिकाःगु र्याली न्युर्योकया ज्याक्सन हाइट्स् लागा चाःह्यूगु खः ।

र्यालीइ परम्परागत वसः, बाजंगाजं व थीथी झाँकीलिसें सलंसःया ल्याखय् ब्वति दुगु खः ।

र्यालीया झ्वलय् अमेरिकन नागरिकलिसें अमेरिकाय् च्वनावःपिं थीथी देयया नागरिकतय्सं भिंतुना ज्याझ्वः व नेपाल सम्वतया बारे न्यनेकने याःगु नेवाः नखः न्यूयोर्कया नायः डा. शाक्यं धयादिल ।

स्वन्तिया प्यन्हुगु दिं म्हपूजाकुन्हु न्हूदँया उत्सव दँयदसं देशय् अले विदेशय् तकं थीथी ज्याझ्वःया ग्वसाः ग्वयाः तःजिक हनावःगु दु ।

२०५६ सालय् तत्कालीन प्रधानमन्त्री कृष्णप्रसाद भट्टराईया पालय् नेपाल सम्वतया नेपाल सरकारं नेपालया राष्ट्रिय सम्वत्या मान्यता ब्यूगु खः ।