त्रिकोणात्मक टी ट्वान्टी सिरिजय् थःगु हे होम ग्राउन्डय् नेपाल नेदल्याण्ड्सलिसे नं बूगु दु ।

बुधबाः किपूया मैदानय् जूगु कासाय् नेपाल नेदरल्याण्ड्सलिसे २ रनं बूगु खः । नेदरल्याण्ड्सया वेन डेर मेर्वें लिपांगु ओभरय् निगू विकेट काःगुलिसें नेपालया ल्हातं कासा वंगु खः ।

लिपांगु ओभरय् नेपालया करन केसी रन आउट जूबलय् दीपेन्द्र सिंह ऐरी बोल्ड जूगु खः । नेदरल्याण्ड्सं ब्यूगु १८५ रनया आज्जु ल्यूगु नेपालया लागिं दीपेन्द्रं ६३ रनया योगदान ब्यूसां कासा त्याकाबी मफुत ।

कप्तान रोहित पौडेलं ५० रनया योगदान बिल । आरिफ शेख व कप्तान रोहितं निगूगु विकेटया लागिं ६५ रनया साझेदारी यासें नेपालया नितिं बांलाःगु सुरुवात याःगु खः । कुशल भुर्तेलं शुन्य, कुशल मल्लं ११ व सन्दीप जोरां ८ रन दयेकल ।

सोमपाल कामी डक आउट जूबलय् करन केसीं ११ रन दयेकल । गुलसन झा व प्रतिश जिसी शुन्य रनय् अविजित जुल ।

डच टिमया रुलोफ वान डेर मेरवे व साइब्रान्ड एनगेलब्रेक्टं २/२ अले आर्यन दत्त, विलियन किंग्मा व टिम वान डेरं १/१ विकेट काल ।

वयां न्ह्यः टस बुनाः न्हापां ब्याटिङ याःगु नेदरल्याण्ड्सं निर्धारित ओभरय् ४ विकेट तंकाः १८४ रन दयेकूगु खः ।

नेदरल्याण्ड्सया लागिं माइकल लेविटं ५४ रन दयेकाबिल । मेक्स ओडाड ४ रनय् आउट जुल । साइब्रान्ड एनगेलब्रेक्ट ४९ रनय् अविजित जुल । कप्तान स्कट एडवर्डस ३३ रनय् आउट जूबलय् तेजा निदामानुरुं ३१ रनया योगदान बिल ।

नेपालया करन केसी व कुशल मल्लं १/१ विकेट काल ।

सिरिज अन्तर्गत नेपालं वइगु शुक्रबाः नामिबियालिसे स्वंगूगु म्याच म्हिती । थ्वयां न्ह्यः सिरिजया न्हापांगु कासाय् नेपाल नामिबियालिसे नं बूगु खः ।