मुनासः ख्यालः कासा हाकनं जुइगु
eBukhan – बिराज, २०८१ बैशाख २७, बिहिबार वर्गीकृत मनोरञ्जन
नेपालभाषाया कला ख्यःया ऐतिहासिक मुनासः ख्यालः कासा हाकनं जुइगु जूगु दु ।
मुनासः नेपाःया थौं च्वंगु ज्यासना पुचःया मुँज्यां स्वनिगःन्यंक तःजिक ‘मुनासः ख्यालः धेंधें बल्लाः कासा ११४४’ यायेगु क्वःछ्यूगु दु ।
थौंया मुँज्यां ‘मुनासः ख्यालः धेंधें बल्लाः कासा ११४४’ या योजनां औपचारिकता काःगु मुनासः नेपाःया छ्यान्जे सुरज व्यन्जनकारं जानकारी बियादिल ।
‘छुं दिं न्ह्यः किपुलिइ जूगु मुनासः नेपाःया ज्याझ्वलय् ख्यालः कासा यायेगु घोषणा जूगु खः । थौं ज्यासना पुचःया मुँज्यां निर्णय यायेधुंकाः थुकिं औपचारिकता चूलाकूगु दु । आः जिपिं तयारीइ न्ह्याःवने’ छ्यान्जे व्यन्जनकारं धयादिल ।
आः ख्यालि जुजु मदनकृष्ण श्रेष्ठलिसें नेपालभाषाया ख्यालः च्वमि, स्यनामि व ख्यालःम्वःपिनिगु मुँज्या च्वनेगु व सकललिसे सहलह ब्याकाःलि माःचाः कथं ज्या न्ह्याकेगु नं व्यन्जनकारं धयादिल ।