वागमति प्रदेशया संस्कृति पर्यटन तथा सहकारी मन्त्री शैलेन्द्र बज्राचार्यं प्राथमिकताया आधारय् आः युद्धस्तरं कार्यक्षेत्रय् न्ह्याःवनेगु धयादीगु दु ।

बागमति प्रदेशया मुख्यमन्त्री शालिकराम जम्कट्टेलं विश्वासया मत काःगुलिसें मन्त्री बज्राचार्यं ईबुखँलिसे खँ ल्हासें थथे धयादीगु खः ।

‘यायेमाःगु ज्या यक्व दु । दक्वं ज्या व योजनायात प्राथमिकताया लिधंसाय् न्ह्याकायंकाः सकसिनं अनुभव याइकथं हे लिच्वः बी’ मन्त्री बज्राचार्यया धापू खः ।

दकले न्हापां भाषा विधेयकयात कार्यान्वयनय् यंकेत थम्हं भूमिका म्हितेगु बज्राचार्यं धयादिल ।

वंगु असोज २२ गते बागमति प्रदेश सभाया वैठकं प्रदेशय् सरकारी कामकाजया भाषा सम्वन्धय् व्यवस्था यायेत दयेकूगु विधेयक सर्वसम्मतं पारित याःगु खः ।

गुगु विधेयकं बागमति प्रदेशया सरकारी ज्याखँय् नेपालभाषा व तामाङ भाषा नं छ्यलेत लँ चाःगु दु ।

‘भाषा विधेयक पारित जुइधुंकूगु अवस्थाय् थुकियात कार्यान्वयनय् यंकेगु भाला जितः वःगु दु । प्रभावकारी रुपं भाषा विधेयक कार्यान्वयनय् यंकेत जिं भूमिका म्हिते’ मन्त्री बज्राचार्यं थःगु याेजना न्यंकादिल ।

आः आम नागरिकं सहकारी सम्वन्धय् तःधंगु हे समस्या फयाच्वंगु अवस्थाय् सकसिनं अनुभव याइगु कथं थुगु समस्या ज्यंकेगु प्रतिवद्धता नं बज्राचार्यं प्वंकादिल ।

थनया जात्रापर्व, मूर्त अमूर्त संस्कृतिया संरक्षण, सम्वर्ध्दन व प्रवर्ध्दनय् आः बागमति प्रदेश सरकारया अहम् भूमिकालिसेंया सशक्त उपस्थिती दइगु बज्राचार्यं धयादिल ।

‘झीगु म्हसीका धयागु हे स्थानीय संस्कृति जात्रापर्व खः व थुकिया संरक्षणया दायित्व प्रदेश सरकारया नं खः । आः स्थानीय जात्रापर्व, संस्कृतिया संरक्षण प्रवर्ध्दनय् बागमति प्रदेश सरकारया प्रत्यक्ष व सशक्त उपस्थिती दइ’ बज्राचार्यं छसिकथं थःगु योजनात न्यंकायंकल ।

देयया अर्थतन्त्र बल्लाकेगु छगू मू आधार पर्यटन जुयाच्वंबलय् थनया १३ जिल्लाया पर्यटकिय गन्तव्यया प्रवर्ध्दन यासें पर्यटक दुकायेत ठोस योजना हयेगु नं वयकलं धयादिल ।

थःत बधाई व भिंतुना ब्यूपिं सकसित सुभाय् देछासें मन्त्री बज्राचार्यं आः हे बधाई नयेगु ई मवःनिगु व नतिजा बियाः हे जक बधाई नयेगु धयादीगु दु ।