बागमति प्रदेशया संस्कृति, पर्यटन तथा सहकारी मन्त्री शैलेन्द्रमान बज्राचार्यं आवंलि सम्पदा पुनर्निर्माणया बजेट खर्च जुइगु तर सम्पदा जीर्ण हालतय् हे लानाच्वनीगु अवस्था न्हनीगु दावी यानादीगु दु ।

मंगलबाः यलया लाय्कू कुमारी दर्शन यायेत रत्नाकर महाविहार झाःम्ह मन्त्री बज्राचार्यं थथे धयादीगु खः ।

व इलय् अन उपस्थित रत्नाकर महाविहारया लिसें थीथी संघसंस्थाया प्रतिनिधितलिसे खँ ल्हासें मन्त्री बज्राचार्यं जीर्ण अवस्थाय् दुगु धार्मिक, ऐतिहासिक, सांस्कृतिक सम्पदाया पुनर्निर्माणया दायित्व बागमति प्रदेश सरकारं हे काइगु धयादिल ।

‘न्हापा बहाःबही, देगःलिसेंया सम्पदा पुनर्निमाणया नामय् बजेट खर्च जूगु तर, सम्पदा धाःसा जीर्ण हे अवस्थाय् लानाच्वंगु खनेदत । आः अथे जुइमखु । आः जिं थम्हं हे निरिक्षण याये व बजेट खःथाय् सदुपयोग यानाः झीगु सम्पदा गर्वसाथ धस्वाके’ मन्त्री बज्राचार्यया धापू खः ।

लिसें मन्त्री बज्राचार्यं संघीयता देय्या लागिं तसकं थिकेय् व बोझ जुल धइगु भ्रम त्वाःथलेत आम जन समुदाययात इनाप यानादिल ।

संघीयताया मर्म व अर्थ मथुयाः भ्रम ब्वलंगु धासें संघीयतायात पाय्छि दिशाय् न्ह्यज्याकाः वास्तविक संघीयता समाजयात बीमाःगु बिचाः वय्कलं तयादिल ।

‘आः संघीय वा प्रदेश सभासदतय्त गुलि खर्च जुयाच्वंगु दु, न्हापा जुजुया पालय् जुजुया कर्मचारीतय्गु तलब उकिया स्वदुगं प्यंदुगं अप्वः वं । संघीयता खर्चिलो मखु, झन् किफायती खः, मितव्ययी खः’ मन्त्री बज्राचार्यया दावी खः ।

थौंकन्हय् बागमति प्रदेशय् जक ६ लाख उद्योग दर्ता दुगु तथ्याङ्क न्यंकुसें बज्राचार्यं संघीयताय् उद्योग, कलकारखाना बन्द जूगु मखसें राजतन्त्रय् हे बन्द जूगु वा बन्द जुइगु परिस्थीति निर्माण जूगु दावी नं यानादिल ।

व हे ज्याझ्वलय् रत्नाकर महाविहारपाखें मन्त्री बज्राचार्ययात सफल कार्यकालया भिंतुसें ख्येँय् सगं नं ब्यूगु खः ।

ज्याझ्वलय् नेपाल हस्तकला महासंघया नायः प्रचण्ड शाक्य, रत्नाकर सहकारीया नायः करुणारत्न बज्राचार्यं न्हापांनिसें स्थानीय संस्कृति, सम्पदाया संरक्षण, प्रवद्र्धनय् सक्रिय मनू हे बागमति प्रदेशया संस्कृति मन्त्री जुयाः वःबलय् समाजय् तःधंगु आशा ब्वलंगु धयादिल ।

उज्वतदेव महाविहारया पूर्व नायः रमेशराज बज्राचार्य, रत्नाकर महाविहार संरक्षण समितिया सचिव किरण बज्राचार्यं समाजयाके सल्लाह, सुझाव कालबिल व सहलह यासें न्ह्याःवनेत मन्त्री बज्राचार्ययात छ्याता बियादीगु खः ।

ख्येँय् सगं ज्याझ्वः धुंकाः मन्त्री बज्राचार्यं पुनर्निर्माणया झ्वलय् दुगु रत्नाकर महाविहारया संरचनाया अवलोकन यानादीगु खः ।

सोमबाः शालिकराम जम्कट्टेल नेतृत्वया बागमति प्रदेश सरकारं विश्वासया मत काःगुलिसें मन्त्री बज्राचार्यं मंगलबाः हे येँ बसन्तपुरया लायकू कुमारी व ख्वपया लायकू कुमारीया दर्शन यानाः आशिर्वाद फयादीगु खः ।